[dropcap]М[/dropcap]ай зурул 17-нний Ккуллал райондалул администрациялий хьунни райондалул терроризмалийн къаршисса комиссиялул батIаву. Шикку гьуртту хъанай бия шяраваллал администрациярттал бакIчитал, школарттал директортал, завучтал, идарарттал каялувчитал.
Комиссиялул даву дачин дурну ия райондалул бакIчинал хъиривма Чаринов МахIаммад.
Терроризмалия буруччин аьркиншивриясса доклад бувна полициялул хIаписар Аьлилов МахIадлул. Ванал, такну ацIлай, бувсуна цукунсса луркIанну дурну дикIан бюхъайссарив террористурал. Бувсуна мукунма цукун буруччин аьркинссарив, нажагь ци-дунугу дахханасса зат чув-дунугу ххал хьурча. Бувсуна цукунчIав ганичIан гъан хьун къабучIишиву ва оьвчин аьркиншиву полициялул зузалайн ягу МЧС-рал аьмсса 112 номерданийн.
Комиссиялул батIаврий ихтилатру бувна райондалул УО-лул каялувчи ХIаммакуева Альбинал, цала Чаринов МахIаммадлул. Цала-цала пикрирду бувсуна Ккуллал райондалул творчествалул къатлул хъунмур Аьбдуллаева Маржанатлул, Ккуллал спортшколалул директорнал хъиривчу Кьурбайтаев Аьжублул, 2-мур ЦIувкIуллал шяраваллил школалул директор ХIабибуллаев Даудлул ва цайминналгу.