Чувшиврул лишан

[dropcap]В[/dropcap]ай гьантрай ЦIуминалийсса ЦIуссалакрал гимназиялий тIиртIунни Аьрасатнал Виричу Мутай Исяевлул аьпа абад буллалисса гьайкал. ДакIнийн бутан, ванан гьайкал дацIан дурну диркIссар нукIура, ЦIуссалакрал бухмур школалул хIаятраву. Утти ва кIичча ларсун, цIумур школалий дацIан дурссар. Ва даврил сиптачиталну хьунни ЦIуссалакрал райондалул администрация. Виричунал гьайкал Ххувшаврил байрандалул гьантрай дацIан давривугу цила тIилисин бухьунссар.


Андриана Аьбдуллаева
[dropcap]В[/dropcap]а кьини ЦIуссалакрал гимназиялул учительтал ва дуклаки оьрчIру кIюрххила бавтIун бия школалул хIаятравун. Виричунал аьпа абад буллали­сса мажлисрай гьурттушинна дан гимназиялийн бувкIун бия ЦIуссалакрал райондалул бакIчи ХIажи Айдиев, ванал хъиривчутал Аьли Исрапилов ва ХIажи ХIажиев, бувкIун бия мукунма шяраваллил жямат. Оьвкуну бия Виричунал ниттийн Язимат АхIмадовайн.

-Утти гьарица кIюрххил школалул бухкIуллуву дарсирдайн нанисса оьрчIру хьуна­бакь­лантIиссар жула Виричу Мутай Исяевлул. Шикку хъанантIиссар дружинарттал батIавурттугу. Барчаллагь гьайкал цIунил дацIан дан кумаг буллай бивкIсса оьрчIан, — увкунни райондалул бакIчинал.

Мутай Исяевлул цIа чувнал яхIирал, бюхттулсса кьянкьашиврул лишанну личIантIиссар. Шяраваллил зума-къирагърайсса лахъазанттуй хьусса данди ба­цIаву ЦIуссалакрал райондалул аьрали тарихрал ца яла ярг­мур лажинну хьуссар.