Лайкьсса мажлис – буттал шяраву

[dropcap]Л[/dropcap]акрал ва Дагъусттаннал цIанихсса чичу, шаэр, публицист, педагог Абакар Мудуновлул 100 шинал юбилейран хас бувсса мажлис хьунни ванал буттал шяраву ГьунчIукьатIув.


Загьрани Аьбдуллаева
[dropcap]О[/dropcap]ьрмулуву кказитрал даврихун машхул хьунгума Абакар Аьлиевичлул кабакьу бувсса кунма чIалан бикIай ттун. Дирхьуну тIий ванал ттухь цила багьайсса куццуй ниттил мазрал дарс, лавхьхьумур хъама къабитансса куццуй. ЦIубутIуй къатIааьн бизлай бивкIнугу ттухьра сайки гьарца дарс цIухлахаву. Яла аьдат хъанай, къацIуххирчан, къаччангума бикIлан бикIайва. Ттун литература ххирасса дикIайва, хаснура — жула лакрал чичултралсса. Бу­ккайссия циняв лу­ттирду, хаварду, повестьру, романну, кIулссия циняв чичулт ци шяравату­сса буссарив, миннал творчество. Цал, дакIнийри, Хан-Мюртазалиясса балай лахьлай буна, ттун «цIивикъан» тIисса махъ къабувчIуна, махIатталгу бивзуна, на цIувххуссия Абакар Аьлие­вичлухь, мунал му ттун куртIну, мяъна лаласунну, бувчIин бувуна. Ттуву хъунмассар Абакар Аьлиевичлул хIурмат, ххигу-ххирар мунал чивчумур, марцIсса, щинтасса, экьинанисса лакку мазрай чивчусса буну тIий.

Абакар Аьлиевичлун 100 шинал юбилей дувансса пикрирду бивкIун бур Гъумук, райондалийгу, ГьунчIукьатIрал школданийгу. Цинцилтту кIу хьуну дур ГьунчIукьатIрал школданул чулухами. Му тIагу-тIайлар. Гьун­чIукьатIрал школданий дарс дихьлай, сайки щалва оьрму харж був­сса педагогнал цала ветераннал, цала шяраваллил аксакалнал мажлис буттал шяраву баву, гьай-гьай, лайкьну чIалай бур. Мунил хъунмур инициативагу диркIун дия школалухь. Мугу хъиннува хIакьну чIалачIисса зат бур.
Лакку мазрал дарсру дишай­сса учительтурал Аьлиева Розал, Къушиева Сиянатлул, Сулайманова Шурал ва библиотекалул зузала Юсупова Жамилял, вайми учительтуращалгу маслихIат ккавккун, щаллу дурну дия программа.

Мажлис нани бувну бия учитель­ница Къушиева Сиянат ва ученик ТIа­гьиров Булгъани (ххюлчинмур классраву дуклакисса). Программа сакин дурну дия чичул произведенияр­тту гьанулун лавсун. Бивхьуна дуклаки оьрчIал Абакар Мудуновлул чивчу­сса, «Къаччинан ччикун къаличIан» тIисса хавардания бувсса сценкагу. Миву гьуртту хьуна дуклаки оьрчIру: ХIажиева Бадружинан, Парханова ПатIимат, МахIаммадов Салим, Юсупов Халипа, Къушиев Нариман. Учительтурал коллективгу лагма лавгун увкуна Абакар Аьлиевичлул чивчусса, «Дяъвилий ккуллалул нажагь утарча» тIисса ва «ПатIимай, ттул гуламан» тIисса балайрду.

БувкIун бия Лакрал райондалия культуралул бакI дургьусса Кьурбанова Лида балайчитуращал ва музыкантътуращал. Увкуна ххуй-ххуйсса балайрду, бивзуна къавтIун, бувна ихтилатру. Райондалул администрациялул чулуха бувкIун бия Соня Макьаева. Мажлисрайн увцIу-цIувххуну, дикI ва аьркинмур ларсун увкIун ия ГьунчIукьатIрал къутандалия Шуаьев Юсуп ва мукунма цаймигу. Шиккува къабувсун къабучIир – клуб­рал сахIналия цила учительначIан бивкIсса хIурмат-кьимат кIицI лаг­лагисса барчаллагьрал махъ цилва чивчусса шеърилийну бувккуна АхIмадова ХIурия Ширванинал душнил.

Творчествалулмур частьрал хъирив, ГьунчIукьатIрал душварал, лагма лавгун, чIюлу бувну бия диялсса дуки-хIачIиялущалсса столлу, бивчуну бия ххункI. Мажлис бачин бувну ия школданул директор Къушиев Малик МахIаммадлул арс. Махъру лавхъуна Абакар Мудуновлул дарс дирхьусса Ибрагьимов Кьурванаьлил, шагьрулия увкIсса ГьунчIукьатIрал ккурандалул вакил АхIмадов Камиллул. Мажлис биялну тяхъа бувна Гъумучату бувкIсса Культуралул къатлул балайчитуралгу.

Буттал 100 шинал юбилей ххуйну ва ххаллилну лагаврия рязи­сса, барчаллагьрайсса ихтилат бувна Абакардул хъунмамур душ Мудунова Гьидаятлул. Хъирив ихтилат бувна душнил душ Чаллаева ПатIимал, гъанчу, «Илчи» кказит­рал хъунама редакторнал хъиривчу, Къардашов Русланнул.
Гъанминнал цала чулухасса бахшишран лавсун бувкIун «Къучагътал» ва «Язи бувчIуми» тIисса Абакар Мудуновлул луттирду, бавчIуна ми мюрщиминнайхгу, хъуниминнайхгу.