Лайкьсса буттал лайкьсса арс

[dropcap]В[/dropcap]ай гьантрай, ЦачIун був Аьрабнал Эмиратирттал (ОАЭ) хъун шагьрулий Абу-Дабилий хьусса джиу-джитсулул дунияллул чемпионатрай цалчинсса кIану бувгьуну, дунияллул чемпионнал цIа ларсунни жуна тачIав хъамакъаитантIисса миллатрал арс МахIаммад Хачилаевлул арснал Хучбардул.


Андриана Аьбдуллаева
ЛичIи-личIисса билаятир­ттаясса муттаэтурайн ххюйла данди увккун, цинявннаяр ххув хьуну ур Хучбар. ЛяличIинува захIматсса ва ягинсса хьуну бур финалданул бяст-ччал. Ва бяст-ччалливу мунал муттаэну ивкIун ур Эмиратирттаясса машгьур­сса спортсмен. Гьай-гьай, тих­сса цинявгу цаламанал чул бувгьуну бивкIун бур. Финалданул бяст-ччал счетрай къуртал хьуну бур. Амма, чялишну иллай ивкIун тIий, лавсъсса хьхьичIун увккун, дунияллул чемпион хьуну ур Хучбар.

Ва ванал цалчинсса Ххувшаву дакъар. Ванияр мукьва зурул хьхьичIгу АСВ лигалул грепплинг­рал дунияллул чемпионатрай цалчинсса кIану бувгьуссия ванал. Уттигу, ва бюхттулсса ххувшавугу ларсун, цинявппагу спорт ххирами ххари бунни. Хучбар цувагу лачIун буккаврил спортрал мастерди. Спортсмен барчаллагьрай ур ва ххувшаву ласун цащала архIал захIмат буллай ивкIсса цала тренер, Дагъусттаннал грепплинграл ва джиу-джитсулул федерациялул президент, ххаллил­сса лакку оьрчI ХIажимурад Аьбдуллаевлуйн.

ДакIнихтуну барча дуллай буру му бюхттулсса ххувшаву. ЧIяру-чIярусса ххувшавуртту ялуннайгу ласлансса хъиндайдихьу хьуну лякъиннав. Гьарца ишираву Заннал кабакьиннав!