[dropcap]А[/dropcap]прельданул 28-нний Къумукьнал театрдануву Дагъусттаннал Журналистътурал союзрал регионал сакиншиндарал IV-сса конференция хьунни. Ваний гьуртту хьунни ттуршунная ливчусса делегатътал.

З. АьбдурахIманова
Конференциялий гьурттушинна дурунни ДР-лул ХIукуматрал председательнал 1-ма хъиривчу Анатолий Карибовлул, информациялул ва аналитикалул управлениялул хъунмур Тамара Чинённаял, ДР-лул миллатирттал иширттал министр Татьяна Гамалейл, печатьрал ва информациялул министр Рашид Акавовлул ва цайминнал.

Республикалул журналистътурал ва хъамаллурал хьхьичI лав­хъсса мукъуву, цала отчет зумуну­сса докладраву регионал сакиншиндарал каялувчи Аьли Камаловлул кIицI лавгунни мероприятие хъанахъишиву республикалун ва аьмну билаятрангу ца яла къабигьасса чIумал.
«Гьашину жулла республикалул шанма кказитран 100 шин хьуссар. Мукунна билаятрал даражалий кIицI ларгссар Аьрасатнал Журналистътурал союзрал 100 шинал юбилейгу. Совет заманная махъсса шинну ккаллийссар журналистътуран къабигьасса, паракьатшиву дакъасса шиннардин», — кунни ванал.

КIицI бувна Аьли Камаловлул ва аралуцIун бавхIусса цаппара цайми масъаларттугу. Миннува­сса агьамминнувух бувсунни редакциярттал материально-техникалул база цIу бан багьлагьишиву, миллатирттал мазурдийсса редакциярттахсса къулагъас ххишаласса дикIан аьркиншиву, шиная шинайн, хIукуматрал чулухасса ссу­ссукьушивуртту сававну, кказитирттал багьу-бизулун хъуни­сса зараллу хъанахъишиву.

Мажлисрай ялагу махъру лавхъуна А. Карибовлул, Т.Га­малейл, Р. Акавовлул, «Илчи» кказитрал редактор Р. Башаевлул, цIахъюрдал «Нур» кказитрал редактор Б. Аьбдуллаевлул, А. АьбдулхIамидовлул, ХI. МахIаммадовлул ва цайминнал.
Ихтилатирттая махъ, цинявннал карду гьаз дурну, Да­гъусттаннал Журналистътурал союзрал хъунаману цIунилгу увчIунни АхIмадлул арс Аьли Камалов.
Конференциялул даву къуртал хьунни цаппара журналистътуран «Мусил барзу» тIисса премияртту дулаврийну.