[dropcap]В[/dropcap]а юбилейрал сиптачигу бия миллатран хъинбалардан­сса давурттив дуллай букъаххай­сса меценат, «Дараччи» клубрал президент Мариян Илиясовал урчIакану бивкIсса Гульшан Хасаева.

«Илчи» кказит буклай байбивхьуния шинмай му кказитрай зузисса ва хIакьинусса кьинигу миккува отделданул редакторну зузисса ПатIимат барча буван бувкIун бия ванил щалва коллективгу, 1-мур ЦIувкIуллал интеллигенциягу, архIал дуклай бивкIмигу.

ЧIявуя вания ххуйсса махъру учин ччими, ванил творчествалун лайкьсса кьимат бищун ччими.
Москавливсса «Дагъус­ттан» культуралул центрданул хъунама Арсен ХIусайновлул цIаниятусса Барчаллагърал ча­гъар ПатIиматлухьхьун буллуна ванил шяравучу, цIанихсса профессор, академик АьвдурахIман Халиловлул.

Дагъусттаннал культуралул министр Зарема Буттаевал цIаниятусса ХIурматрал грамота дуллуна «Илчилул» хъунама редактор Руслан Башаевлул, Ккуллал райадминистрациялул хъунама Шамил Рамазановлул цIаниятусса Барчаллагьрал чагъар буллуна «ЧаннацIуку» кказитрал редактор АбрекI Къянчиевлул.

ПатIимат барча буллали­сса ихтилатру бувна ЦIувкIратусса профессортурал, академиктурал – МахIаммадбаг ХIусайхановлул, Рамазан Багъатаевлул, АьвдурахIман Халиловлул, химиялул элмурдал кандидат Кьурбан Юнусовлул, филологиялул элмурдал кандидат Элен СантIуевал, Дагъусттаннал ХIукуматрал ва БакIчинал администрациялул пресс-службалий зузисса Наида МахIаммадовал, чIярусса шиннардий «Илчилул» хъунама редакторну зий бивкIсса Аьрасатнал культуралул лайкь хьусса зузала Качар ХIусайнаевал, Дагъусттаннал лайкь хьусса строительтал Мурта Муртаевлул ва Сайдун ХIажикьурбановлул, таможнялул къуллугърал полковник Башир СантIуевлул, шяраваллил жяматрал иширттавух мудангу чялишну хIала уххайсса МахIаммада Рамазановлул ва хъуначу Сулайман Аьбидовлул, Поэзиялул театрданул хъунаманал хъиривчу Аьбдулкьадир НакIучиевлул ва цаймигу бусравсса инсантурал.

Юбилейрал мажлис усттарну бачин бувну ия Дагъусттаннал лайкь хьусса культуралул зузала Ссупиян Оьмаров. ПатIимат Рамазановал мукъур­ттийсса балайрду тIий бия Дагъус­ттаннал халкьуннал артистка Луиза Шахдилова.

Залму АьбдурахIманова