[dropcap]М[/dropcap]айрал 18-нний ниттил бувсса кьини кIицI лагантIиссар сайки щалва оьрму кIулшивуртту дулаврил аралун хас бувсса Дагъусттаннал лайкь хьусса учитель, ДР-лул кIулшивуртту дулаврил отличник, Читтурдал шяраватусса Мирзаева Индира Нураттиннул душнил. Ва жуна чIявучин кIулсса, бусравсса, Гъумучиял школалий дарс дихьлай ивкIсса цIа ларгсса математикалул учитель Нураттин Маммаевлул душри.
Жун, 15 шинай ванил каялувшиврулу зий бивкIсса МахIачкъалаллал 37-мур школа-лицейрал коллективран, Индира Нураттиновна дакIнихтуну барчагу буллай, учин ччай бур вания ца-кIива махъгу.
1974 шинал мусиль медальданий Гъумучиял школагу къуртал бувну, Индира Нураттиновна дуклан бувхссар Дагъусттаннал паччахIлугърал филологиялул факультетрайн. Итххявхсса студентка хIисаврай, дачин дурну бивкIун бур факультетрайсса комсомол сакиншиндарал ва профсоюзрал давугу.
ЯтIул дипломращал университетгу къуртал бувсса Индира Нураттиновнал захIматрал ххуллу байбивхьуссар МахIачкъалаллал 40-мур школалия. Гьунар бусса учитель хIисаврай, ва най бунува итталун багьссар.
Оьрус мазрал ва литературалул дарсру дишаврицIун ванил хъуннасса къулагъас дувайсса диркIссар оьрчIащалсса тарбиялулмур даврихгу. Тания шиннайра къакьамулну дур ванил дакIнин «захIматсса оьрчI» тIисса калимагу. Давриву щала дакI дирхьусса жагьилсса учительницагу хъинну ххира хьуссар ванил цила цалчинсса дуклаки оьрчIан. Шичча ва тIайла бувкссар МахIачкъалаллал 3-мур школалул завучну зун. Шикку зун бивкIун цаппара хIаллава ванийн тапшур бувссар шагьрулуву ца яла ццунну халкь яхъанахъисса кучардал дянивсса 37-мур школалул директорнал къуллугъ.
Аьратталсса 90-ку шинну асар хьусса хъинну захIматсса бивкIссар му школа ва шиккун дахьва бувкIсса чIумал. Чан-чанну тIий Индира Нураттиновнаща бювхъуссар хIакьинусса кьининийн ва школа МахIачкъалаллал яла хьхьичIунсса 10 школалул сияхIрайн лахъан бан. ХIакьину жущагу, жул дуклаки оьрчIащагу пахрулий: «МахIачкъалаллал 37-мур школа-гимназиялий зий ва ккалай буссару»,- учин бюхъайссар.
Жул выпускниктал дуклай буссар билаятрал яла хьхьичIунми вузирдаву ва, ххуй-ххуйсса пишакартал хьуну, зий буссар личIи-личIисса касмурдай. Вай циняр ккаккиярттугу жул гьунар бусса каялувчинал хIарачатри.
Цал ттигу дакIнихтуну барча буллай, Индира Нураттиновнан чIа тIий буру цIуллушиву, цила оьрчIаясса ва оьрчIал оьрчIаясса тирхханну.
Жун, вил каялувшиврулу зий бивкIсса учительтуран, тачIав дакIния къабуккантIиссар ина жун бувмур, иш багьний, жул дакIурдиву бумур бувчIуну, лалавсун, чIявусса кIанттурдай жун дурсса хIаллихшиннарду. Битаннав ина Аллагьнал оьрмулул буччиннин, вила ххирацириннал хъихъи бивтун!
МахIачкъалаллал 37-мур школа-гимназиялул
щалагу коллективрал цIания ХIасанова Маликат
