Мюрщултрал гьунардал байран

ЦIуссалакрал 1-мур ДЮСШ-рал чIава спортсментал Республикалул цачIун дур командалуву гьуртту хьунни Къазан шагьрулий хьусса Ххувшаврил байрандалун хас дурсса Щалагу Аьрасатнал 24-мур Кекусинкай-каратэлул турнирданий.


[dropcap]М[/dropcap]икку гьуртту хьунни Аьра­сатнал 30 региондалиясса 270 спортсмен. Пахру бансса иш хьунни ва турнирданий гьуртту хьусса ЦIуссалакрал 1-мур ДЮСШ-рал мукьагу спортсменнал хьхьи­чIунсса кIанттурду бугьаву. Сайпуллаев Астемирдул ва Кьурбанов АхIмадлул бувгьунни цалчин­сса кIанттурду, ХIаммадов Халидлул бувгьунни кIилчинсса кIану ва Умариев Шамиллул – шамилчин­сса кIану.
ДЮСШ-рал коллектив ва оьрчIал нину-ппу барчаллагьрай бур гьарица ишираву спортсментурал чIарав ацIайсса ЦIуссалакрал райондалул бакIчинал хъиривчу ХIажи ХIажиевлуйн.

* * *
ЦIуминалийсса ЦIусса­­кку­ллал шяравусса «ЦIуллу-сагъшиву дуруччаврил» центрданий аьдатравун дагьну дур чIава акробатътурал гьунарду аьч буллалисса бяст-ччаллал соревнованияртту дуллалаву. Вай гьантрай центрданий хьусса акробатикалул соревнование хас дурну дия Ххувшаврил Кьинилун. Акробатикалул турнирданий гьуртту хьунни 80-нния ливчусса оьрчIру. Бяст-ччаллу байбивхьуна оьрмулул 4 шинавусса яла чIавами акробатътурая. Турнирданий гьуртту хъана­хъисса оьрчIру вардиш буллай бур цила даву шавкьирай дайсса спорт­рал минахур Анисат Сидаевна.
Ххув хьуминнан ЦIуссалакрал райондалул чулухасса кубокру, дипломру ва бахшишру дуллунни райондалул физкультуралул ва спортрал хъунама пишакар Анзор Абакаровлул.
ОьрчIру спорт ххирану тарбия баврил ялув хъуннасса даву дуллай ур каялувчи Амирхан Оьмаев.

* * *
Вай гьантрай Каспийск шагьрулий хьусса грепплинграл Европанал чемпионатрай ххувшаву ларсунни ЦIуссалакрал райондалул 1-мур ДЮСШ-рал спортсменнал. ДакIнийн бутанну, утти­нингу ЦIуссалакрал райондалул 1-мур ДЮСШ-рал спортсментурал, республикалул ва Аьрасатнал лагрулийсса чемпионатир­ттай гьуртту хьуну, так цалчинми кIанттурду бувгьушиву.
Ва ххуллухсса бяст-чча­ллавугу кIилчинсса кIану бувгьунни 1-мур ДЮСШ-рал лавайсса категориялул тренер-преподаватель Абачараев Сулайманнул вардиш уллалисса МахIаммад ХIажиевлул.
ЗахIматсса бяст-ччаллаву Италиянал, Азирбижаннал ва Румыннал спортсментуращал данди ув­ккун, МухIаммадлул финалданий бувгьунни кIилчинсса кIану.

* * *
ЦIуссалакрал райондалий­сса 1-мур ДЮСШ-рал ЦIуминалийсса Шушиннал шяраву боксрал секция тIивтIуну шин хьун дурар. Боксрал тренерну ши­кку зий ур Аьрасатнал спортрал мастер Иркъуев Сайпуттин.
Тренерну зуннин Сайпуттиннул, Аьрасатнал ва Дунияллул халкьуннал боксрал чемпионатирттай гьуртту хьуну, цимилгу хьхьичIунсса кIанттурду бувгьу­ссар. Сайпуттиннул хIарачатрайн бувну Шушиннал школалийсса спортзалдануву дузал дурну дур оьрчIру спортрахун багьансса цинярда шартIру.
Вай гьантрай Сайпуттиннул хIадур бувсса чIава спорстментал цалчин гьуртту хьунни Умахановлул цIанийсса Олимпий резерврал Республикалул хасъсса ДЮСШ-рал боксрал первенствалий. Вайннал цалчинсса аьрххигу хьунни тIайлабацIу бусса. 2006-2007 шиннардий бувсса спортсментуращал данди бувккун, Жалиев Каримлул ва ЖахIпаров ХIадислул бувгьунни цалчинсса кIанттурду, шамилчин­сса кIану – ХIажиев Имамлул.
2004-2005 шиннардий бувсса спортсментуращал данди був­ккун, Юнусов Исламлул ва ХIамзаев Кинаннул бувгьунни кIилчинсса кIанттурду.
Гихунмайсса бяст-ччаллавугу хьхьичIунсса кIанттурду бугьлан­сса тIайлабацIуртту хьуннав зун, оьрчIрув!
ХIадур бувссар
Имара Саидовал