[dropcap]К[/dropcap]улпатрал кьинилун хасну, Сергокъалаллал райондалий Дегва шяраву хьунни 16-чин дуллалисса кулпатрал художествалул творчествалул фестиваль – «Да­гъусттаннал кулпат». Му сакин дурну дия Республикалул Халкьуннал творчествалул къатлул Сергокъалаллал райондалул администрациялущал ва аслийсса культуралул центрданущал цачIуну.

Бадрижамал Аьлиева
[dropcap]Р[/dropcap]еспубликалул сайки гьарцагу райондалий дур кулпатрал ансамбльлу. Му чулуха аваданни Сергокъалаллал район: шикку ми дур сайки 30-ннийн дирсса. Гьашинумур фестивальданийсса 17 кулпатрал ансамбльданува 12 дия ва райондалиясса. Вай бакъасса, махъми гьурттучитал бия Ккуллал, Хасавюртуллал, Къайтагъуллал ва Лаващиял районнаясса. Ккуллал райондалиясса Мудуновхъал кулпатрал (Карим, Шагьеризада, Дивир, Аьйшат ва Ибрагьим) ансамбль цалчин гьуртту хъанай дия ва фестивальданувух.

Ххюра ссятрал лахъишиврийсса программалул лагрулий, республикалул личIи-личIисса кIанттурдая бувкIсса коллективирттал ккаккан бунни цуксса авадан­сса багьу-бизугу, ярг-яргсса балайрдал, къавтIавурттал, музыкалул дуниялгу дуссарив Дагъусттаннал халкьуннал.

Фестивальданувух гьуртту хьу­сса гьарцагу коллектив лайкь хьунни ДР-лул Культуралул министерствалул чулухасса дипломирттан. Мукунма миннан бахшишран буллунни «Дагъусттаннал халкьуннал творчество» тIисса лу-альбом, кIива томрай итабавкьу­сса, чIярусса ва ранг-рангсса суратирттащалсса.