[dropcap]И[/dropcap]юньдалул 16-нний ДР-лул Печатьрал, коммуникациярттал ва дахIаврил министерствалий ххал бивгьунни миллатирттал прессалул агьамми масъалартту.
[dropcap]М[/dropcap]икку идаралул хъунама Рашид Акавовлул бувсунни гьашину июньдалул дядирзсса ппурттуву миллатирттал кказитру хьунабакьинтIий бушиву цалва буккултращал.
— Жунма аьркинссар кIул буван жула кказит чичлачиминнал ва ккалаккиминнал пикри-зикрирду, хIакьинусса кьини миллатрал кказитирттай цукунсса масъалартту гьаз бувну ччай буссарив. Бюхъай инсантуран кказит цамур журалий итабакьлай ччай бикIангу. Гъансса чIумул мутталий жува цу-цуми районнай ва шагьрурдай дан дурив мукунсса хьунабакьавуртту. Миккун бучIавантIиссар циняв редактортал. Хьунабакьавурттал хIакъираву баян бавантIиссар цила чIумал, — увкунни Р. Акавовлул.
Ихтилатру буллалиминнал тIимунийн бувну, миллатирттал прессалул тIалавшин цIана ларайсса даражалий дакъар, цанчирча чIявуми ниттил мазурдий гъалгъа тIий бакъашиврийн бувну ягу ниттил мазру къакIулшиврийн бувну.
— ХIакьину аьркинну дур миллатирттал кказитирттахсса къулагъас ххишаласса дуллан, миннул тIалавшингу, сийгу гьаз дуллан, кказитру ккалансса гъира бизан буллан», — увкунни ДР-лул Журналистурал Союзрал председатель Аьли Камаловлул.
Хьунабакьаврий ихтилатру бунни цайминналгу.
ХIадур бувссар
ХI. Аьдиловлул
