Хъун дакъасса жул Къяннал шярава дяъвилийн лавгун ур 127 адамина: зана къавхьуну ур 58, зана хьуну ур 69. ХIакьинусса кьини сагъну акъар дяъвилийн лавгсса цаягу къяничу.
Ттун чIявуну дакIнийн агьай жяматраву бусравсса, гьарца давриву гьуртту шайсса, ляличIину мазрай цIу бусса, амма, цIу бурча куну, биривмур къаучайсса Жамалхъал Къада Жамаллул арс. «Къада дядя» — укун учайссия ванайн гьарцаннал.
Къада дяъви байбишиннина, 1939-ку шинал, Совет аьралуннаву къуллугъ буллай ивкIун ур Винницкий областрай Тайсин тIисса шагьрулий.
«Жуламиннангу щак багьлай бухьунссия, жу хьхьугу-кьинигу дазул чулийнмай нани бувну бияв», — тIий, бусайва Къадал. Яла цакуну баян бувна тIива фашист Германия жуйнма ххяххаврил хавар. Къада усса дивизиягу хIала бувххун бур душманнащал талай. Къада талай ивкIун ур 37-мур битултрал дивизиялуву. Ца чIумал ванайн щаву дирну, Щипитовка тIисса шагьрулий госпитальданийн агьну ур. Микку хъин хьуну махъ Къада агьну ур артиллериялул частравун. Ва гьуртту хьуну ур Миллитополь, Севастополь тархъан буллалисса талатавурттавух.
Жула аьралуннал Берлин ласайни, Къада талай ивкIун ур 1-мур Прибалтикалул фронтрай.
Гьуртту хьуну ур Къада Японнащалсса дяъвилийгу. Японгу бух бувну, зана хьуну ур шавай. Ванан дурккун дур: ЯтIул ЦIукул орден, Буттал кIанттул цIанийсса дяъвилул 1-мур даражалул орден, чIярусса медаллу.
Къада ия цIанихсса дарзи. Ванал дайва кителлу, хIажакру, рахIурду. ВаначIан бучIайва Ккуллал ва Лакрал районнал шяраваллавасса инсантал. Къадал, дуккин бувну, ликкурай бацIан бувну бур арулва оьрчI: мукьва душ, шама арс. Арулунналагу ларсун дур ларайсса даражалул кIулшиву.
Майрал 9-нний Къадан хьунтIиссия 100 шин.
Рамазан МахIаммадов,
ш. Къян
