[dropcap]А[/dropcap]ьрасатнал Конституциялул суд­рал судья, Дагъусттаннал ва Аьрасатнал лайкь хьусса юрист ХIадис ХIажиев ивунни Дагъусттаннал гуманитар институтравун.

[dropcap]В[/dropcap]а вузрал ректор Мурад Шяпиевлул бувсунни Москавлиятусса хъамаличунахь институтрал оьрмулия, Аьрасатнал сийлийсса вузирдащалсса дахIаврия, студентътуран исламрал ва тарихрал куртIсса ва цIакьсса кIулшивуртту дулаву мурадрай дуллалисса давурттая.

ХIадис ХIажиевлул бувсунни гуманитар институтрал даврин Аьра­сатнал Президентналгу лахъсса кьимат бивщушиву. «ХьхьичIва динийсса кIулшивурттал хъирив багьсса жулва жагьилтал чил билаятирттайн дуклан лагайва, личIисса опытгу ба­къасса ми личIи-личIисса иширттахунгу багьайва.

Чил кIанттурдайминнан хавар ба­къассар Дагъусттаннал бусурман цукун яхъанай буссаривгу. Мунияту динчитал хьун ччисса жагьилтурал исламрал кIулшивуртту ватандалий ларсун хъинссар, зул вузраву ттизаманнул гуманитар кIулшивуртту ласлай бур, на ххарира укунсса вуз бушиврия ва хIадурссара кумаг буллан», — увкунни ХIадис ХIажиевлул.
ХIадис ХIажиевлул студентътурал суаллахьхьунгу жавабру дуллунни.

П. Рамазанова