Владимир Васильев гьуртту хьунни Путиннул инаугурациялий

Майрал 7-нний ДР-лул БакIчи Владимир Васильев гьуртту хьунни Кремлилуву Владимир Путин Аьрасатнал Президентнал къуллугърай ацIаврил шадлугърай.

Владимир Путиннул хъа бунни, яла махъгу лавхъунни. Ихтилатраву мунал билаятрал инсантурахь барчаллагь увкунни АьФ-лул Президентнал бувчIавурттай ка бакьаврихлу. Мунал бувсунни хIадурну ушиву Аьрасатнал кьуват ххи бангу, тIутIайх бичавугу, цIа бюхттул давугу ванияргу бюхттул дуван, билаятрал агьалинал тIалавшинну ва умудру бартбигьин. Миннуяр ххишалагу ПаччахIлугърал бакIчинал бувсунни цува къуллугърай авцIукун дузал бан аьркинсса масъаларттал хIакъиравугу.

«ЦIусса ххуйсса оьрму, узданшиву, мюхчаншиву, инсаннал цIуллу-сагъшиву – мири хIакьину инсаннан аьркинми затру, мири дикIантIисса жул политикалуву яла агьаммину», — увкунни АьФ-лул Президентнал. Мунал мукунма бувсунни, ишбажаранчитурал, аьлимтурал, творчествалул сянаткартурал ва чялишну къуццу тIун ччисса инсантурал каширду ишла дуллансса гьарташиву, илкиншиву дузал дуллан аьркиншиву.

Владимир Путиннул ихтилат­рал хIакъираву Владимир Васильевлул журналистътурахь укун бувсунни: «Ва бувчIавурттал хьхьичIсса ппурттувугу, мунил хъирив хьусса иширтталгу, дунияллул халкьуннал дянивсса тагьарданулгу гьарца кулпатраву ва гьарца инсаннал хьхьичI гьаз буллай бур укунсса суаллу: «Цукун­сса оьрму бикIанавав жулва ттинияр шихунмай? Ссайнну жува утти кIункIу тIунтIисса? Цир жула бакIрачIан бучIантIимур?». ХIакьину Владимир Владимировичлуща бювхъунни ми суалла­хьхьун жавабру дулун. Президентнал бувсунни жулва тарихраву хьумуния. Жулва буниялагу бур махIаттал хьун буллалисса тарих. ПаччахIлугърал Президентнал бувсунни жулва хьхьичI бавцIусса, бартбигьин аьркинсса масъалар­ттая. Бувсунни жущава бартбигьин хьумуния ва бан-битан аьркинмуния».

ХIадур бувссар
ХI. Аьдиловлул