Хъарас щаврил байран – ЧIяв

[dropcap]Ч[/dropcap]ан-чанну тIий жула зунттаву щюллишиву янилун дагьлан диркIунни. ХIатта интнил ца барз гьарчагу, гъилишиву дурар Лакку билаятрайн дучIан. Уттигу буллайнма бур марххалтту.ТIайлар, ца-кIира кьинилува бассай. Дуллай бур Ккуллал райондалийсса шяраваллаву Хъарас щаврил байранну.


ХIажимурад ХIусайнов
Апрельданул 22-нний хъарас щаврил байран дурунни ЧIяйнналшяраваллил. Ва байран дуван цайнма лавсун бия жагьилсса кIия чIяйричунал – Аьбдуллаев Салманнул ва Каллаев Аьвдулкариннул. Ганиннин хьхьичIсса кьини марххала буллай диркIсса дуниялгу даруну, баргъ бивтсса ххуйсса кьини хьуна. ЧIяйннал шяраваллил СПК-лул зузала Мирзаев ХIадис рульданух щяивкIун, бартри дархIусса, ссихIирал шардал чIюлу дурсса Т-150 тракторданий балайрдащал, гармун-дачIулущал, къавтIавурттащал шяраваллил инсантал бувккуна ЧIяйннал шанбачIулийн. Хъузалал рахIу лавххун, хъарайх ххуржинтту дирчуну ия ХIанапиев Руслан. Хъарас щун нанисса тракторданущал нанисса шяраваллил инсантал ларххун бия ххуй-ххуйсса яннарду.

Шяраваллил администрациялул къатрачIа аглан хьуну, байрандалийн бувкIсса хъамал барча бувуна шяраваллил бакIчи МахIаммадов Исял, му кьинилул сававчитал Каллаев Аьвдулкариннул, Аьбдуллаев Салманнул ва Ккуллал райондалул бакIчинал хъиривчу Чаринов МахIаммадлул. Хъув бияйхту, шяраваллил бугьарами арамтурал дуаь дуруна. Яла диргьуна Цалчинсса хъарас. Инсантал мархри батIлай, Хъузалайн щин рутIлай бия. Ваналгу ца-кIия инсан иникIмалул гъулутин увуна.

Гания гихунмайсса байрандалул ишру бавчуна «аэродромрай». Гикку хьуна жагьилтурал, бугьараминнал дянивсса спорт­рал бяст-ччаллу. Дия балчант ххяххан баву, лечаву, гира личаву, архъан кIункIу даву. Га яла гур дагьсса лахIзалий аэрод­ромрал ялув хьуна чIири самолет. Бунияла, гагу ххуйя байран чIюлу дуван. Ца-кIилла шяраваллил ва даралул лагмагу дур­ккун, самолет щядиркIуна аэрод­ромрай. Га ия цала самолетрай байрандалийн увкIсса Ккуллал шяравасса Аьллаев Анатолий. ОьрчIру, хъуними, самолетрал хьхьичI, чIарах бацIлай, суратру ришлай бия.

Бяст-ччаллу къуртал хьуну махъ мажлис къур хьуна шяраваллил залдануву. Гиву бяст-ччаллаву ххув хьуминнан дуллуна грамотартту ва арцуйну­сса бахшишру. Гьай-гьай, бия авадансса ссупрагу. Дуклаки оьрчIал, культуралул зузалтрал ккаккан дурна хъинну ххуйсса концерт. Циняв кувннал кув барча буллай, цIуллушиву чIа тIий, дакIру кIидачIлай ливчIуна ах­ттакьуннин.