АлхIаткьини райондалул цинявппа школарттай рирщунни махъра-махъсса занг.
Гьарцагу шинал Лакрал райондалул администрациялул зузалт лагай школарттайсса махъва-махъсса занглил байрандалийн, школа къуртал буллалими барча бан, миннахь ххуллухъин учин.
Зулайхат Тахакьаева
[dropcap]В[/dropcap]а базилух райондалул бакIчи Юсуп МахIаммадов ивунни ГьунчIукьатIрал школалийн, миккусса даву ххуйсса ххуттай душиву ва райондалул лагрулий дуллалисса спортрал ва культуралул мероприятиярттай чялишсса гьурттушинна дуллай бивкIшивугу хIисаврайн лавсун.
Гьашину ГьунчIукьатIрал школа къуртал буллай ур арула оьрчI.
Шярава бувксса цаннаяр ца цIанихсса миллатран ва щала пахрулунсса инсантураягу бувсун, школа къуртал буллалиминнахь ххуллухъин тIий, Юсуп МахIаммадовлул увкуна:
— Ххирасса оьрчIрув! ЦIана зул оьрмулуву дуркIун дур хъинну жаваблувсса чIун, оьрмулул цIусса ххуллул кIи-шан бачIулийн бувксса. Гьай-гьай ххишала дакъа хъуннасса агьамшиву дуссар тIайласса ххуллу язи бугьан бюхъаврихь. ДакI дарцIуну ура зу зува язи бугьансса ххуллул ялув кIуну пикри бувшиврий. На зун дакIнихтуну тIайлабацIу чIа тIий ура! Цумур ххуллу язи бугьарчагу, хъамамабитару, зух ялугьлай буссар, зул буруккинттарай буссар зул нину-ппу, учительтал, шяравалу, район. Гьантлия гьантлийн хъунна хъанантIиссар зуйсса жаваблувшинна. Жул зуйнсса умудру чIявуссар. Кьадарданул чунмай бичирчагу, хIарачат бувара зула нитти-буттан ва миллатран лайкьсса арсруну буккан.
Гьашинусса дуккаврил шинал хIасиллаягу бувсун, дуккавриву ва спортраву хьхьичIунсса ккаккияртту хьун дурсса оьрчIан школалул директор Малик Къушиевлул дуллуна ХIурматрал грамотартту. КIулшиву дулаврил ва магьирлугърал зузалтран Юсуп МахIаммадовлулгу дуллуна райондалул администрациялул чулухасса ХIурматрал грамотартту ва бахшишру.
