Ххувшаврил байрандалул гьантрай, жула билаятрай бакъа, мунил кьатIувгу, миллионну халкьуннал гьуртту шай утти аьдатравун дагьсса «БивкIу бакъасса полк» тIисса акциялий. Ттунгу ттула буржну чIалай бур ттулами нитти-буттал ппухълу дакIнийн бичин.

---

Залму АьбдурахIманова
Лакрал ва Гъуниннал дазуй­сса Ппалассуннал шяраватусса ттул буттал кIия буттауссу ХIасанов Шяпи ва Камилгу ятIа-тIар бакъа ба­къахьуминнал сияхIравух бу­ссар. Гъан-маччаминнал бусаврийн бувну, Шяпи Ленинградуллал областьрай хъунама лейтенантнал чиндалуву талай ивкIун ур. КIамахъаллал шяравату­сса ниттил нину Марияннул ппу Щайххъал Аьлингу мува кьадар нясив хьуну бур. Ва сурат­райсса ттул ниттил буттал ппу Аьвдул-Гъапургу мукуна хавар къабувкIминнавух ивкIссар. Цаппара шиннардил хьхьичI Орловскаллал областьрайсса Димит­ровуллал райондалий «аьмсса гьаттаву» увччуну ушиву кIул хьуссар.

Ттул ниттил ппу МахIаммад арсвавращал

Цимилгу ттуйнма нава ссибизлан бикIара, ттула бугьара хьусса уссурссуннахь цIухху-бусу буллай, вагу цIуххинссияхха, таниягу чичинссияхха тIий. ХIайп, вай махъсса кIира шинал дянив цаннал хъирив ца лавгунни ттул ниттил агьулданиясса (суратрайсса), КIамахъаллал шяраватусса МахIаммадов Аьвдул-Гъапурдул арс Бутта, хъирив ганал душ СалихIат ва уттигъанну – Зурпа-ХIажигу. Вайннала Марзият тIисса ссингу, ттул ни­ттил ппу МахIаммадлунгу (ялун цIа Марххала учайсса) жагьилну бунува нязаннийсса бивкIурду нясив хьуну бур. Вайннала Апанни тIисса чIана-чIивима уссугу ахиратрал хьуссия ацIрахъул шиннардил хьхьичI. Аьпа баннав утти цинявнналагу.

Буттал арс
Аьвдул-Гъапур МахIаммадов
Ва лухIи-кIяласса суратрал тарихрацIунгу бавхIуну, кIицI лаганна ттула ниттил Ххадижатлул буттауссурваврал ва бу­ттарссил дяъвилий ливчIсса цала буттал аьпалун жу циняв цачIун батIайсса, хъинну ххуй­сса ­аьдат кьадиртшиву ирсирай. Гьар шинах, Ххувшаврил кьини кIицI лагайсса майрал 9-нний, ттул нитти­уссурвал, ниттил ссура­хъал, уссур­ссу, миннал оьрчIру ва оьрчIал оьрчIру батIайссия цал Ташкантлив, яла КIамахъалив, вай махъсса шиннардий арсваврачIа МахIачкъалалив яхъанай бивкIсса оьрмулул хъунма-хъунмамур Са­ли­­хIат буттарссичIа.

Ши­кку вай, Хъун дяъвилий жанну харж дурсса цала ппугу, аьмну Мукьар­хъиял даралувусса жяматрал чиваркIгу дакIнийн бивчуну, гайннал рухIирдая кьулгьу-алхIамгу бувккуну, хъунмасса ссупралул лагма лагайссияв. Чара бакъа гикку СалихIат буттарссил ччергъилттухун аьрай ливчIсса лакрал чиваркIуннаха балайрдугу щаллу бувайссия. Ва пагьмугу ванийн бивну бия усттарну балай учайсса цила нину Умаматлуя. Ттунгу чан-кьанну дакIний дур аьпабиву. Жагьил­сса ласгу дяъвилий акъа хьуну, ряхва оьрчI цилалу ччаннайгу бацIан бувну, лякьлул кIира дард дурхIусса, цIакьсса хасият дусса бава дия га.

Макьала чичингу ва сурат савав хьуну духьувкун, чичинна ттухьва ттула ниттиуссу, цала буттал буттал цIа дирзсса, Аьвдул-Гъапурдул бувсмур.
МукьцIалла шинавун увхсса-къаувхсса Аьвдул-Гъапур дяъвилийн увцусса чIумал, ванал хъуна-хъунама арс МахIаммадлун 12-13 шин диркIун дур. Му диркIун дур 1942 шин. Дяъвилийн тIайла укка­ннин му Бабаюртуллал райондалийсса КIамахъаллал къутандалий дучри ябуллай ивкIун ур. Кулпат баннин, щарнил арамтуращал къалайчишиву дуллай, Къарачай-Чаргаснавун ва тихаллил шагьрурдайн лага-учIайсса жагьил ивкIун ур.

Дяъвилийн уцаврищалгу ва агьну ур бахьттагьалтрал дивизиялувун. Ванащал архIал Мукьархъиял щархъавасса арамталгу бувцуну бур. Ниттиуссил бусаврийну, миннавасса ца Урувату­сса МахIаммадов Халид ивкIун ур. КIиягу багьну бур дяъви яла къизгъинсса Курскаллал дугалийсса талатаврийн. Гужсса талатавуртту най духьунссия, сайки щала дивизия гиккува бухлавгун бур.

ЧIярусса шиннардий ятIа-тIар бакъа бакъа хьуминнавух ивкIсса Аьвдул-Гъапурдул цIагу ляркъуссар Орел шагьрулий ялапар хъанай ва хIакин-урологну зий ивкIсса ванал Бутта тIима арснал арс Камалуттиннун. Мунал га дивизиялул махъра-махъсса талатаву чув диркIссарив, миннал бакIрачIан ци бувкIссарив кIул бувну махъ, шиха гъан-маччанал щаллусса делегация лавгун бивкIссар тихун Ххувшаву ларсун 60 шин хъанахъисса юбилейрал чIумал. 70 шин хъана­хъисса юбилейрал чIумалгу ттул ниттиуссурвавращал, ниттил ссурахъавращал ппу увччу­сса аьрщарайн Аьвдул-Гъапурдул арс, аьпа бан цал, Зурпа-ХIажигу лавгссия. Орловскаллал областьрайсса жула диаспоралул, вай хъинну ххуйну хьунагубавкьуну, та талатаврия гьарта-гьарзану бусансса гид-экскурсоводгу лявкъуну, хъинну ххуйсса аьрххи сакин бувну бивкIссар.

Ниттиуссил бусаврийну, буттал ппу талай ивкIсса га махъра-махъсса талатаву хьуну дур лагмава кунцIуллив, мюрщи нехру гьарза­сса, так-мак мурхьру-къатIри ххявхсса, инсан гьан-учIан захIматсса ца лахъшиврий. Сайки 120-140 аьра­личунан нясив хьуну бусса бур та кIану бивкIулул кIануну. Тикку «уссур­ваврал гьаттаву» бивхьуминнавух лявкъу­ссар Аьвдул-Гъапур ва Урувату­сса Халидгу.

ХIакьину, дунияллий уттигу паракьатшиву чанну душиву дакIний дургьуну, ва бюхттул­сса Ххувшаву ласаврил ххуллий харж дурсса жаннугу, бивхьусса захIматгу зумух лавсун, чIа учин ччай бур жунма, жула оьрчIан дакьаву ва паракьатшиву. Къакка­кканнав щинчIав дяъвилул зулмугу, мунил ххурхху-пIякьгу.