Ххувшаврил ккуран – Ккурклив

[dropcap]Г[/dropcap]ьар мудан кунна, лавайсса даражалий кIицI ларгунни Ххувшаврил байран Ккурккуллал шяравугу. КIюрххила щарнил майданнив бувккун бия школалул учительтал ва дуклаки оьрчIру, шяраваллил жямат. Ххувшаврил парад­рай гьуртту хьун шагьрурдая ва лагма щархъая бувкIун бия бусрав­сса хъамал.


Хъун дяъвилий гьуртту хьуминнан дацIан дурсса гьайкалданучIа дуклаки оьрчIал дурккунни дяъвилия зана къавхьусса 57 ккуркличунал цIа. Хъирив вайннал суратир­ттащал хIурматрай шяраваллил майдандалул лагма бувккунни.
Му кьинилул мажлис тIитIлай, ихтилат бунни Ккурккуллал шяравусса аьрали музейрал хъунама Даниял Магьдиевлул. Ванал бувсунни Ватан душманная дуруччин аьрайн лавгсса ккурккуллая ва вайннал аьпа абад бан шяраву ва школалий дуллалисса давурттая. Бувсунни, щалагу билаятрай БивкIу бакъасса полкрал акция аьдатравун дагьаннин, ванияр 35 шинал хьхьичIра, му Ккурккуллал шяраву дуллай байбивхьушиву.

Ихтилатру бунни дяъвилия зана къавхьусса ХIасанов МахIаммадлул душнил Сарзинатлул, дяъвилия зана къавхьусса Сулайманов Илияслул арснал Аьвдулбасирдул, дяъвилул участник Магьдиев Загьидинал арснал Аьвдулжаппалдул
Асар хьунни жяматран Ханича Аьлиевал ихтилат ва мунил аьрайн лавгминнаха чивчусса шеърирду. Дуклаки оьрчIал увкунни дяъвилул балайрду.

Гьарица шинах Ккурккуллал ккурчIай школалул учительтурал ва дуклаки оьрчIал шяраваллил жяматращал цачIу дуллалисса Ххувшаврил парадрал цал ялагу тас­ттикь буллай бур вирттавран бивкIу бакъашиву, ми абадлий халкьуннал дакIурдиву личIантIишиву.