[dropcap]Л[/dropcap]аргунни шин, ДР-лул лайкь хьусса хIакин, медициналул элмурдал кандидат, ЧIалачIиндарал ва пластикалул реконструкциялул хирургтурал Аьрасатнал обществалул мяйжаннугусса член, МухIсиннул ва СахIибатлул арс Камалов Шамсуттин ахиратрал хьуну.

[dropcap]Ш[/dropcap]амсуттин увну ур 1939 шинал КIулушацIрал шяраву. Ванан кIива барз хьусса чIумал ппу увцуну ур армиялийн. Дяъвилия ласгу зана къавхьуну, 17 шинавусса ниттин тай захIматсса шиннардий цина хъуна уллан багьну бур арс. Ппу акъашиву кIул хьун къаивтун, хъунагу увну ур арс.. РяхцIалку шиннардий дагъусттаннал мединститутгу бюхттулсса даражалий къуртал бувну, зун тIайла увккун ур Лакрал райондалийн. Зий ивкIун ур цал Ккурклив, яла Гъумучиял азарханалий хирургну.

Му чIумал Гъумукун учIайсса ивкIун ур отпускалий дунияллийх цIа ларгсса лор-хIакин профессор Къажлаев МахIаммадхан (Мурад Къажлаевлул ппу). Ла­ккуйсса къашайшалт кьамул буллай, операциярттугу буллай ивкIун ур. Шамсуттин га зузи­ссаксса хIаллай, ганан кумаг буллай, чIара-карах ацIлай икIайсса ивкIун ур. Ванал гъирагу, бюхъу-бажаргу чIалай, МахIаммадхан цува лавгун, министрная измугу лавсун, цащала увцуну Бакуйн, цува каялувшиву дуллалисса институтраву му касму цила багьайкун лахьхьин дурну дур.

МахIаммадханнал Шамсу­ттиннун цала давриву ишла бай­сса инструментирттал бувцIусса чемодан пишкаш бувну бур ва му бусраврай ябуллай ивкIун ур.
Цаппара хIаллай МахIач­къа­лаливгу зий ивкIун, Шамсуттин увххун ур Москавлив аспирантуралувун. Дугу-дуклай, зугу-зий кIира шин ва дачIиннул дянив чирчуну диссертациягу, 1969 шинал му ххаллилну дурурччуну дур.
1974 шинал МахIачкъалаллал муххал ххуллул азарханалий лор отделениялул хъунаману ивтун ур. Ванал цIа Дагъусттаннай ялу-ялун машгьур хъанан диркIун дур.

Хъунмасса хIаллай ва ивкI­ссар парторганизациялул секретарнугу. Шамсуттиннул кабинет­рал чIира чIюлу бувну бикIайва ванал хIалал дур­сса грамотар­ттал, дипломирттал, барчаллагьрал чагъардал. Ва икIайва хъин хьуну нанисса инсаннал увкусса барчаллагьраяр ва бувсса зукьлулияр ххуй­сса ци дикIайссар тIий. Цала пишалул даража лавай баву мурадрай, ва цимилагу лавгун ур чил хIукуматирттайн, Германнавун, Чехословакиянавун, кIул хьуну ур машгьурсса инсантуращал. Аьрабусттаннал билаятрай Яманинал республикалул тIалав увну, Шамсуттин зий уссия Таиз тIисса шагьрулий. Цува тиккун учIаннин майрай, кьакьарттай, вичIай операция бувсса иш хьуну бакъая тIий буслай икIайва.

Оьрму рахIму бакъасса бур, яла язими, яла гьунар буми яла лавгун, миллат мискин шай. Цума-цаннангу Заннал итабакьай цанмасса оьрмулул бутIа. Шамсуттиннун къабуллуну бур лахъину оьрму бутансса мутта. Цибан­ссар, кьадардануща хха­ссал хьун къашай. Авадансса дакIнил заллу, яхI-къириятрал виувцIусса зунттал чув, чIявусса инсантуран ххуй-хъиншивуртту хьун дурсса, цIуллушиву зана дурсса, цимирагу къумашиву рахIатшиврийн дуккан дурсса инсанъя Шамсуттин. Ванал цIа ва аьпа бусраврай ябуллай бур ва ххирами ва ванан ххирами.

Гъан-маччанал цIания
ссурахъу Нажбуттин,
ш. КIулушацIи