[dropcap]Г[/dropcap]ьар шинах жула билаятрай «Шинал кулпат» тIисса щалва Аьрасатнал даражалийсса конкурс шай. Ванил мурадгу хъанахъиссар кулпатрал сий гьаз даву ва нитти-буттал хъачIунттайсса жаваблувшиндарал агьамшиврия бусласаву.
З. АьбдурахIманова
Ванил сакиншиннагу дувайссар Аьрасатнал Минтрудрал ва ЗахIматсса иширттавун багьсса оьрчIал чIарав бацIайсса фондрал.
Конкурс дувайссар кIира ятIапрай. Цалчинмур ятIапI дувайссар июньдалул 15-нин гьарцагу регионнай ва щалва Аьрасатнал даражалийсса кIилчинмур ятIапгу – июльданул 15-нин.
Конкурсрал хIасиллу дурну, бахшишру дуллалисса хъуннасса шадлугъ хьунтIиссар Москавлив ноябрь зуруй.
Ва конкурсравух гьуртту хьун ччиминнан цал жулла республикалий хьунтIимуний гьуртту хьун аьркинссар.
Мунияту майрал 25-нин ванивух гьуртту хьун ччисса кулпатирттал аьрзри тIайла буккан аьркинссар ДР-лул ЗахIматрал министерствалийн. Цалчинмур ятIапрай ххув хьуну, язи бувгьусса кулпат Москавлив хьунтIисса кIилчинмур ятIапрай гьуртту хьун тIайла буккантIиссар.
Конкурсрал хIакъиравусса цIухху-бусу буван бюхъантIиссар, ДР-лул ЗахIматрал министерствалийн ва телефондалул номерданийн оьвкуну: 8 (8722) 64-22-56
