[dropcap]Б[/dropcap]уттал кIанттул цIанийсса Хъунмасса дяъвилий Ххувшаву ларсун 73 шин бартлагаврин хас дурсса шадлугърал мероприятиярттал лагрулий Дагъус­ттаннал Росгвардиялул управлениялул зузалтрал шархьунни цила дикIайкунсса саллатIнал каша ЦIусса Хушет поселок­райсса искусствалул школалул дуклаки оьрчIан. Полевой кухня тIивтIуну бия школалул хIаятраву.

КIюрххила Каспийскалийсса ОМОН-лул зузалт чялиш бувккун бия, 200-нния ливчусса дуклаки оьрчIан ва хъамаллуран саллатIнал каша дуллай. Ца кIункIурдуву шахьлай бия гречка, гамуниву – перловка.
— Вай кашардаву буссар аьра­личунан аьркинсса цинявппа витаминну ва микроэлементру. Ца аьраличунансса порциялий 200-250 гр. дикIайссар. Вайннувух хIала байссар чимус, къур ва дикIул тушенка. Жула каша дикIан аьркинссар нахIусса, кIирисса ва Ххувшаврил тIин бу­сса, – тIий, буслай ур оьрчIахь кухнялул хъунама цIигьур Казим Ус­ттарханов.

Каша шахьлахьиссаксса хIаллай искусствалул школалул дуклаки оьрчIал ккаккан дунни цала хIадур дурсса программа, увкунни дяъвилул балайрду, кка­ккан дунни къавтIавуртту, дур­ккунни назмурду. Балайрду увкунни байрандалийн бувкIсса машгьурсса балайчитуралгу.

Вана шархьунни кашагу. Ярг­лий бавцIунни дуклаки оьрчIру ва хъамал. Сахаватсса ОМОН-лул каша дирунни цинявннан. Дуклаки оьрчIал нитти-буттал дакIнихтуну барчаллагь увкунни цала оьрчIан укун ххаллилсса байран дурсса ОМОН-лул зузалтрахь. Каспийскалийсса ОМОН-лул командирнал хъиривчу, полковник МахIаммад МахIаммадовлул бусласимунийн бувну, вайннал кьюкьлул зузалт гьарца шинах гьуртту шайсса бур ва школалул дуллалисса мероприятиярттай.
— Вай оьрчIащал ччя-ччяни хьунабакьлакьиссаксса, вайннан жул къуллугърах гъира багьантIиссар, — тIий ур хIаписар.

Андриана Аьбдуллаева