Аьрщарахсса ччаврихлу

Гьарца шинал, Ххувшаврил байрандалун хасну, Гъумук ларайсса сакиншиндарай шай спортрал бяст-ччаллу: ка дишаврил, пут личаврил, тIанкI учаврил ва волейболданул.

Миннул ца яла дакI тIайлама тама­шачи ур, архну ялапар хъанай ухьурчагу, буттал кIанттуя дакI ва пикрирду якъабуцайсса жула Аьлил АхIмадовгу. Багьавай хIалалли ванан ттигъанну дуллусса «Аьрщарахлусса ччаврихлу» тIисса республикалул ларайсса наградагу.

Волейболданул турнир тIитI­латIисса шадлугърай райондалул администрациялул бакIчинал хъиривчу Абакар Къюннуевлул, даингу лакрал чIарав ушиврухлу барчаллагьгу куну, Аьлиллул хъазамрай ларчIунни наградалущалсса лишан.
Жугу «Илчи» кказитрал редакциялул ва буккултрал цIания дакIнихтуну барча тIий буру миллатрал хIакьсса патриот, жула дус-ихтивар Аьлиллухь ва ларайсса награда.

Зулайхат Тахакьаева