[dropcap]Ч[/dropcap]иттурдал шяравасса Аьвдулмажидлул арс СалихI ХIасановлуя жу хьхьичIвагу чивчуссия.
ДакIнийн бутан, СалихI хушрай лавгун ур дяъвилийн, талай ивкIун ур 102-мур танкирдал бригадалулпротивотанковый батареялуву Брянскаллал, Воронежуллал, Сталинградуллал, Донской ва Юго-Западный фронтирттай.
Жан дуллуну дур 1943 шинал август зурул 2-нний Белгородрал областьрайсса Прохоровка тIисса поселокрая арх бакъа. Увччуну ур СалихI Покровка тIисса шяравусса уссушиврийсса гьаттаву.
Ларгсса шинал, Ххувшаврил байрандалул гьантрай, СалихIлул арснан Аьбдулмуслимлун ва душнин Айманатлун Мюхчаншиврул министерствалул Централ архиврал сайтрайхчин кIул хьуну бур цала буттан Саратовуллал областьрайсса Богатыревка тIисса шяраваллил цIанийсса къизгъинсса талатавурттаву ккаккан дурсса къучагъшиврухлу «За отвагу» медаль дулун ккаккан дурну диркIшиву ва 1990 шинал му гъан-маччанахьхьун дулун тIайла дурккун диркIшиву.
Наградной листрай бувсун бур ХIасанов хIаласса аьралитурал артиллериялул, минометирттал цIу тIиртIуну, душман кIийла айщун увшиву, вайннал, ккуллардал цIарава цала ярагъгу буккан бувну, душманнал пушкарду ва 70-нния ливчусса саллатI ва хIаписартал бат бувшиву. Гвардиялул красноармеец ХIасанов ХIукуматрал наградалун – «За отвагу» медальданун лайкь хьушиву. Амма ва награда виричунал наслулучIан диян хъуннасса чIун ларгун дур.
СалихIлул душ Айманат бур, ппуПензеллал областьрая лавгун ивкIнавхьур дяъвилийн, тийх луглай бухьунссия ванал гъан-маччанах, мунияту цайнма тIайла бацIаннин чIун ларгхьунссар тIий. Ци чулийгу, наградалул виричу лявкъуну ур. Дирну дур ахиргу буттал медаль оьрчIачIан. Арснал Аьбдулмуслимлул формалувусса буттал суратрай медальгу ларчIун, хахливу дирхьуну дур суратгу, наградной листгу. Ххувшаврил байрандалул кьини СалихIлул оьрчIал оьрчIру ва миннал оьрчIру лагай ванал суратращал БивкIу бакъасса полкрал кьюкьравух.
