«Къучагъшиврул дарсру» тIисса акция хьунни МахIачкъалалив, «Дагъусттаннал халкьуннал балайрду ва къавтIавуртту» тIисса ансамбльданул къатраву. Ванил сакиншинначиталну хьунни «Координациялул ва культуралул информациялул центр».
А. Аьбдуллаева
Центрданул дуллалимунил чIарав бавцIунни КIулшивуртту дулаврил, Культуралул, Жагьилтурал иширттал, Виваллил иширттал министерствартту, Дагъусттаннал аьрали комиссариат, «Кибердружина» цIанилусса жяматийсса суккушинна ва Каруннай бияврил федерация.
Мероприятиялий гьуртту хьунни 300-ннийн бивсса дуклаки оьрчIру. «Кибердружина» суккушиндарал каялувчи Григорий Пащенкол ккаккан дунни дуклаки оьрчIан ттизаманнул техникалул, интернетрал каширду, бувсунни WI-FI сетьрайхчIин жула телефоннавун цучIав къауххан цукун мюхчан хьун аьркинссарив.
— Кибертерроризм – цIанасса заманнул цIуцIи кIанур. Буссар инсантал, жула телефоннавун бувххун, жуява кIул буллай, кIул хьумур жува оькки-ккакку бан, нигьал бан ишла буллалисса, — тIий буслай ур Григорий Пащенко. Ванал бувсунни дуклаки оьрчIахь мукунсса инсантуран закондалийн бувну цукунсса танмихI байссаривгу.
Шикку ихтилат бунни ДР-лул печатьрал ва информациялул министрнал хъиривчу Сергей Снегиревлул. Цала ихтилатраву ванал кIицI лавгунни жяматраща бюхъантIишиву терроризмалул ва экстремизмалул идеология дух дан.
Ванал мукунма бувсунни интернетраву, миллатирттал дянив дичлачисса материаллу кIул дуллалаву мурадрай, «Горячая линия» зузи дурну душиву, акциялул лагрулий «Чистый интернет» цIанилусса конкурс хьунтIишиву. Ва давриву чялишну гьуртту хьуминнан смартфонну, пироскутерду ва цайми бахшишру дулунтIишиву. Ахирданий ккаккан дунни мероприятиялий гьаз бувсса масъаларттан хас дурсса кинофильм.
