Хьунхьуви жулами кучардугу ккаккиялун бишинсса

ЦIана МахIачкъалалив ацIнияхъайсса кучардай щириркIуну дур ххуллурду бакьин буллалисса, ми цIу буллалисса давуртту. Жула хъуншагьрулий ца яла агьамссаннун ва лахъиссаннун ккаллисса Шамиллул цIанийсса кучагу бур тIавтIсса, хунтIуллив гьарзасса, машинарттал «пробкартту» бакъасса кьини къашайсса ца яла захIматсса куча.


З. АьбдурахIманова
«Мюхчансса ва ххуйсса ххуллурду» тIисса федерал программалул лагрулий цIана ва ххуллу бакьин буллай сукку хьуну буссар ва кIантту-кIанттурдай бордюрданул чартту баххана бувну, ххуллурдай­сса хъунтIри дащавриха зий байбивхьуну буссар.

Ва ххуллуцIун дархIусса унгу-унгусса давуртту дайдишин хьхьичI, шагьрулул хъуниминнал пикри бусса бур, халкь авара къабулланшиврул, машинарттал «пробкартту» къахъананшиврул, мунил чIарахсса ххуллурду низамрайн буцинсса. Мисалдаран, цIана ххуллурдал отделданул зузалт зий бусса бур, Абубакаровлул кучалия тIайла хьуну, Ярагъскийл кучалучIан бияннинсса ххуллу бакьин бавриха. Мукунма «Россия» кинотеатрданул лагма-ялттусса кучардайсса ххуллурдахагу зий бур.

Аьмну ккаккан дурсса чIумуйннин Советский райондалийсса 25 куча бакьин бантIий бусса бур. ХIакьинунин вай кучардайсса давурттал 85-90 % бакьин бувну, щаллу шавай бусса бур.