Мюхтажминнах вичIилий

Май зурул 4-нний Дагъусттаннал региондалийсса «Единая Россия» партиялул председатель Дмитрий Медведевлул приемнайлуву агьали кьамул бунни АьФ-лулПаччахIлугърал Думалул депутат Аьвдулмажид МахIрамовлул.


Имара Саидова
ЦIуссалакрал райондалий­сса ЦIуссачIурттащиял шяравасса МахIаммадрасулова ПатIимат бувкIун бия МахIрамовлул цинма бувсса кумаграхлу барчаллагь учин.
МахIачкъалалив ялапар хъанахъисса Офелия Абакаровал ма­съала бия медициналул аралуву­сса дурухлурдан хас дурну дурсса ахттаршиннарду дузрайн дуккан дан кумаг баву тIалав буллалисса. Аьвдулмажид МахIрамовлул махъ буллунни ванил дурсса ахттаршиннарду Москавуллал хьхьичIунсса клиникарттал пишакартуран кка­ккан дурну, миннун багьайсса кьимат бищаврил ялув ацIан.

Къарабудахккантуллал райондалийсса Ачису поселокрай ялапар хъанахъисса Баталов Ися увкIун ия цалва къашавай­сса ссу хъин бансса кумаграл хъирив. 2012 шинал ванал ссу Асият ххуллул апатIрахьхьун биривну, кIусса цIунцIияртту хьуну дур. Тания шинмай ваний цимилгу операцияртту бувну бур Москавливсса клиникарттай. Уттигу вайннан аьркин дагьлай дур Аьрасатнал клиникарттай хъин хьунсса квота. МахIрамовлул ва масъала, хъирив лавну, дузал бан тапшур бунни цала кумагчитурайн.

Мукунма ва кьини депутатнал кьамул бувсса агьалинал масъалартту бия даврил щаллу баврил, жагьилтурансса футболданул майдан баврил ва пенсиярттал перерасчет даврил хIакъиравусса. МахIрамовлул цинявппагу цачIанма бувкIсса агьалинащал ккавккунни мас­ли­хIатру ва кIицI лавгунни ци­нявппа масъалартту дузрайн буккан баврил ялув цува ацIантIишиву.