[dropcap]Ш[/dropcap]ахьуйннал шяраву цIуну буллай байбивхьусса мизитрацIун дархIусса давурттан хасну махъсса ппурттуву лув-ялув субботникру хьунни. Миннул лагрулий диялсса давуртту дунни шяраваллил жагьилтурал, уссушиврийсса цайми шяраваллал, цайми миллатирттал жагьилталгу лагма лавгун.

---

[dropcap]У[/dropcap]ттигъанну шяраву лявкъу­сса хъинну хьхьичIавасса мизитраву цикссагу шиннардий цачIун хьусса пара-ччюрк дуккан дунни. ЦIуну буллай байбивхьусса мизитрал цоколданул зивулул гьанулийн бетон бутIиншиврулсса хIадуршинна дунни, мизитрал хьулурду бикIантIисса кIанттурдай шанма чурттунсса гьанурду бив­ххунни.

ЦIуну буллалисса мизитрал давурттан хасну утти­гъанну хьусса ирглийсса мажлисрай гьурттушинна дунни личIи-личIисса шяраваллал жагьилтурал. БувкIун бия Гъумучату, Гъумучиял хъун мизитрал имам МухIаммадманнар Бариев хIаласса, ГьунчIукьатIатусса, Лакрал райондалул личIи-личIисса щархъавасса, Ахъушиял райондалиясса, МахIачкъалалиясса жагьилтал, республикалул Хъун мизитрал хъунама имам Му­хIаммад Ссаламов хIалану.

— Хъунмасса барчаллагь учин ччай ура кумаг бувсса, чIарав бавцIусса цинявннахьвагу. Кулпатирттаву барачат ххи хьуннав, цIуллушиву дулуннав вай жагьилтурахьхьун, ва кьини бувсса захIматгу Кьиямасса кьини цинцилттай Аллагьнал хIисав буваннав. Вания тихуннай дуллалисса давурттавух гьуртту хъанахъими ялу-ялун чIяву хьуннав, — тIий ур шяраву мизит баврил сиптачитуравасса, сакиншинначитурава­сса ца Сагидов МахIаммада.

[dropcap]В[/dropcap]ай ларгсса бигьалагай кьинирдайгу бивунни шяра­вун Шахьуйннал жагьилтал. Ми­зитравунсса хьулурдал гьанурдалун чартту бивчуну бур. ГьунчIукьатIату трактор дучIан дурну, биххан бувну бур аьркин­сса кIанттурду. Жагьилтал барчаллагьрай бур ГьунчIукьатIатусса АхIмадлуйн, багьа къалавсна, ва даву дур­сса.

Мизит буллалисса давур­тту дахьра цила нирхирайн дагьлай дур. Умуд бур ва Заннал цIа­нийсса давриву гьуртту хъанахъими ялу-ялун чIяву хъананссар тIисса.