Синааьрщарахасса кушулул инсан рахIат уккан айссар

[dropcap]М[/dropcap]айрал 16-нния 19-ннийн бияннин МахIачкъалалив ятинсса ва ургала акъа ливчIсса оьрчIансса 4-мур школа-интернатрай хьунни синааьрщарая ссихьри даврил ва тIаннуй накьичру дишаврил мастер-классру. Миннул сиптачиталну бия Республикалул Халкьуннал творчествалул къатта.

---

Бадрижамал Аьлиева
[dropcap]С[/dropcap]инааьрщарая ссихьри даврилмур мастер-класс бачин бувну бия Республикалул Халкьуннал творчествалул къатлул пишакар, Бархъаллал шяравасса Зугьра Гьарунова.
— Синааьрщараясса затру даву – му аьвзалзаманная шихуннай­сса усттаршивур, цилгу цикссагу кьюлтIшивуртту дусса. ХьхьичIава щаву хьусса кIанттурдайгума дишайсса диркIссар аьрщи. Му ба­къассагу, синааьрщаращалсса даврил инсан паракьат, рахIат ай­ссар. Мастер-классрайгу, ххира­сса оьрчIрув, зуща бюхъантIиссар аьрщи каниву дугьан, зун щуркIал хьунтIиссар тIабиаьтрал ляличIисса материалданул гъилишиву, — тIисса мукъурттийну дайдирхьуна Зугьрал оьрчIащалсса хьунабакьаву.

[dropcap]Б[/dropcap]акIзумания байбивхьуну, цукун-ци дайссарив буслай, пишакарнал ва цала оьрмулуву цалчин аьрщи канил дургьусса оьрчIал цачIусса хIарачатрал ахирну хьунни ссихьрал личIи-личIисса бакIру. Зий бунува оьрчIал усттарна­хьхьун буллалисса суаллугу чан хъанай бакъая.
— ОьрчIан бавахъал ва ттатта­хъал лажинтру дусса ссихьри дуллалаву хъинну хIаз бивзунни. ОьрчIан аьрщараха зун ххуйну лахьхьайхту, ссихьрансса яннарду дувангу ла­хьхьин бувантIиссар. Ва проектрал сиптачитурал ва ттул агьаммур мурадну хъанахъиссар махъа нанисса ник жулла культуралухух гьан дуваву, оьрчIан, «Барби-ссихьуй» ягу «Человек-Паукрай» хIайран къахъанайна, жуллами, миллатиртталми, ссихьри ххира шаву. Ва хьунни ттул оьрчIащалсса даврил цалчинсса опытну, ттун даши дирзунни оьрчIащалсса даву ва умуд бур вания гихунмайгу вава куццуй зун­сса, — буслай бия Зугьра мастер-класс къуртал хьуну махъ.

ТIаннуй накьичру дишаврил, тIаннуя личIи-личIисса затру даврилмур мастер-класс бачин бувну ия УнцIукIуллал шяравасса цIа дурксса усттар МахIаммадаьли МахIаммадаьлиев. Ванал цащалла ларсун увкIун ия цалла карунних дурсса хIадурнасса затру, щаллагу дунияллийх цIа дурксса унцIукIуллал усттартурал эмаратру: цIубичулт, вазарду, шкатулкарду, кьалантру бишай затру, усру лаххай «къуса», мукунма – усттарнал давриву ишла бувайсса ярагъ ва махъсса кьай-кьуй.

ТIаннущалмур давугу оьрчIан хъинну ххуй дирзуна. Вайннал МахIаммадаьлихьхьун буллали­сса суаллал дазу-зума дакъая: ва ци мурхьирал тIамар, тIаннуя дурсса зат ваксса дюрчIуну хьуншиврул ци дуван аьркинссар, вай ярагъ, кьай-кьуй хасну ссан ишла дувай­ссар, оьрчIний усттар цува ци пиша язи бугьан хияллай ивкIун ур тIисса ва м.ц. МахIаммадаьлил бувсунни дурмур дюрчIуну дикIаншиврул, ял­тту лак-сирданул арулла къат ду­ккайшиву, гьарцагу къатлингу ца хьхьу-кьини аьркиншиву. Ца зат дуван лагайсса дур, ца-кIира нюжмардуя тIайла хьуну, ца-кIира шинайн диянуксса чIун. Масалдаран, щяв дишайсса, хъуннасса ваза дуван лагайсса дур шинаяр ххишаласса чIун, хъунмур чIунгу лагай­сса дур тIама кьакьаннин – тIаннуя станокрай аьркинсса куц кьувкьуну, сверлорах мунил вирдакI дур­ккун, кьакьан дишайсса дур опилкар­ттай – тIаннул затру кьакьан дувай­сса ва кьяйда бусса бур аьвзалзаманная шинмайвасса.

— Ва пиша ттуйн бивунни буттал буттая. Жул тухумрайн «Анчихъул» учайссар, мура «Анчи» цIа дусса накьичгу дуссар ттул ттаттал дуккан дурсса, таржума дулларча, «гъайувкусса хъу» тIисса. Мяйжаннугу, гъайувкусса хъуниха лархьхьусса накьич дур. ЦIанасса чIумал жул тухумраву ва сянатраха зузисса, ца на акъа, цама акъар. Аллагьнайн щукру, ттула оьрчIругу (кIива душ ва арс) лахьлай бур ва касму, дунияллий щихачIав къалархьхьусса ус­ттаршиву аманат дуванми бур, — буслай ур МахIаммадаьли.

ОьрчIан ва кьини кIул хьунни унцIукIуллал усттартурачIа яла машгьурми мурхьру бушиву ахъвазандалулсса, вахIшисса хъюртулсса, гьивхьхьулсса, махIиялулсса (боярышник), жунавралсса (кизил), тутлилсса. КIул хьунни «кIуллул магъ» тIисса ва мукунна цайми-цаймигу хIазсса цIарду дусса накьичру, кIул хьунни жунаврал мурхьирал тIама, хасъсса пачливу гъили дуркун, пластилин кунна, кIукIлу шайшиву ва хасну му мурхьирая дайшиву унцIукIуллал усттартурал «визитная карточкалун» ккаллийсса аьсавр­тту.
Гъинттулсса каникуллу къуртал хьуну махъ, Республикалул Халкьуннал творчествалул къатлул гихунмайгу буллантIиссар халкьуннал канил пишардацIун бавхIусса мастер-классру.