Ххютула – чаннайн

[dropcap]А[/dropcap]прельданул 18-нний ДР-лул ХIукуматрал Председатель Артем Здуновлул каялувшиврий хьунни Аьрасатнал УФНС-рал пилотрал проект республикалий дузрайн дуккан даврил хIакъиравусса батIаву.


БатIаврий ххал бивгьунни строительствалул бутIунсса сурсатру машан ласаврил система аьч хьун даврил ва закондалий дакъасса налогирттал оптимизациялул схемалия инкар шаврил масъалартту.

Артем Здуновлул бусаврийн бувну, строительствалул лагрулий тIайласса налогирттал политика дузал даву хIакьинусса кьини хъанахъиссар агьамсса масъалану:
— Жува чIявуну гъалгъа тIий буру республикалул бюджетравун налогру гьарзану дучIан дуллан аьркиншиврия, мунинсса шартIру дузал дуван аьркиншиврия, ишбажаранчитал налогирттал сияхIрайн ласлан аьркиншиврия.

Республикалунсса хъунмур налогирттал луртан, буниялагу, строительствалул бутIувур дусса. Мунияту жува муния байбишинну: хIадур данну хIакьсса план, налогру дучIайсса кIанттурдугу ккаккан бувну. Яла мукуннасса проектру дузал дуванну цайми бутIравугу, — кунни премьер-министрнал.
Налогирттал проектрая гьартану бувсунни ДР-лийсса УФНС-рал каялувчинал хъиривчу Нуруллагь Хизриевлул.

Ихтилат хьунни мукунма федерал налогирттал къуллугърал ва Аьрасатнал ФСБ-лул цачIуну билаятрал къалмул рынок «чаннайн» буккан баврил проект дузрайн дуккан давриягу.
Масъала ххал бигьаврил ахир­даний Артем Здуновлул ца­ла цалчинма хъиривчу Рамазан Аьлиевлуйн, строительствалул ва ЖКХ-лул министерствалийн, мукунма Дагъусттаннал УФНС-райн тапшур бунни пилотрал проектрансса «ххуллул карта» (яни дуллансса давурттал план) хIадур дуван.

ХIадур бувссар
ХI. Аьдиловлул