ЦIуссалакрал райондалул ТIюхчардал 1-мур школа тIивтIуну бур 2014 шинал. ЧIирисса чIумул дянив школалул ххуйсса ккаккияртту чIалачIи дунни дуккавриву ва дуккаврил кьатIувсса давурттаву.
ХIакьинусса кьини ва школалий дуклай ур 200 оьрчI, зий ур 27 учитель. Миннава шама учитель ур АьФ-лул аьмсса кIулшивуртту дулаврил хIурматлувсса зузала, кIия ур ДР-лул КIулшивуртту дулаврил отличник, ца учитель ур ДР-лул культуралул лайкь хьусса зузала. Цинявппагу учительтал, школалул директор Дадаев ШайхахIмадлуя тIайла хьуну, цала даву ххирасса ва зун гъира бусса пишакартал бур.
Учительтуралгу, дуклаки оьрчIал ва нитти-бутталгу хIарачатрайну, чIирисса чIумул дянив ТIюхчардал школалул цIа гьаз хьунни. Ва школалул дуклаки оьрчIал мудан хьхьичIунсса кIанттурду бугьай райондалулгу, республикалулгу олимпиадарттай, спортрал ва цайми бяст-ччаллаву.
А. Аьбдуллаева
ДР-лул БакIчи Владимир Васильевлул, кIулшивуртту дулаврил ва элмулул министрнал хъиривчу Сергей Кравцовлул, ДР-лул кIулшивуртту дулаврил ва элмулул министр Уммупазил Оьмаровал дуклаки оьрчIал дянивсса щалагу Аьрасатнал олимпиадалул региондалул этапрай гьуртту хьуминнащалсса хьунабакьаврий ЦIуссалакрал райондалия бия шанна олимпиадалий ххув хьусса ТIюхчардал 1-мур школалул 9-мур классрал дуклаки душ ПатIима ХIаммадова.
Уттигъаннугу, ДР-лул КIулшивуртту дулаврил министерствалул сипталий дурсса ниттил мазрай шеъри буккаврил республикалул конкурсрай «Лакку маз» тIисса номинациялий цалчинсса кIану бувгьунни ТIюхчардал 1-мур школалул дуклаки душ Диана Кьурбановал. Ванил бувккунни 1999 шинал дяъвилул иширттаву жан дуллусса Тенгиз ХIусайновлун хас бувсса «ИвкIусса арснаха» тIисса Роза Камутаевал шеъри. Жюрилун хъинну бювххунни Дианал бувккусса шеъри. Ва конкурсрайн хIадур бувну бия лакку мазрал учительница Диана Гулиевал.
Ванияр махъ ТIюхчардал школалий хьунни Аьрали балайрдал райондалул конкурс. Конкурсрал дия кIира номинация: «патриотическая песня» ва «инсценированная военная песня». «Патриот балай» номинациялий цалчинсса кIану бувгьунни вава школалул дуклаки душ Айгул Макьоевал. Ванил увкунни АхIмадхан Султаннухасса лакку мазрайсса балай (художествалул каялувчи – музыкалул учитель ХIасан ХIусайнов). «Инсценированная военная песня» номинациялий жюрилул лавайсса кьимат бивщунни «Дяъвилул оьрчIру» тIисса, Алина Барцуевал, Айгул Макьаевал, ХIабибат Самадовал ва 3-4 классирттал дуклаки оьрчIал хIадур дурсса композициялун (художествалул каялувчи – Жамиля Кьурбанова).
ТIюхчардал школалул цIа мукунна гьаз дунни 8-мур классрал дуклаки оьрчI Руслан Кьурбановлул. Ва ххув хьунни «Живая классика» тIисса райондалиймур конкурсрай. Утти ва гьуртту хьунтIий ур республикалулмур конкурсрайгу. Руслан конкурсрайн хIадур увну ур литературалул учитель Аьйшат Ссамадовал.
Ва школалул дуклаки оьрчIру ххув хьунни цаймигу бяст-ччаллаву. ХIаммадова ПатIимал, Оьмаров Аьбдулманаплул ва Аьлиев Набинал хьхьичIунсса кIанттурду бувгьунни физкультуралул олимпиадалул региондалиймур этапрай (учитель – ХIажи Буттаев).
ЧIа тIий буру ТIюхчардал школалун вайннуяргу бюхттулсса ххувшавуртту ва тIайлабацIуртту.
