[dropcap]Д[/dropcap]урусну ца шинал хьхьичI 78 шинаву жула дянива лавгунни хIакьсса пишалул заллу ва ка сававсса хIакин, КIулушацIрал шяраватусса Камалов Шамсуттин МухIсиннул арс.

З. АьбдурахIманова
[dropcap]П[/dropcap]ишалул бюхъулуцIун, нахIу­сса мукъуйнугу къашайшалал къюву хьхьара дан шайсса хIа­киннал цIагу халкьуннаву бусравну, хIурматрай зумух ласлайнна личIайнуккар.
Сайки, 60-нния лирчусса шинну медициналул дунияллун хас дурсса Шамсуттин Камаловлул цала оьрмулуву чIявусса халкьуннан кумагру бувссар ва, азара­хъул къашайшалтрал дардирдах вичIигу дирхьуну, багьайсса дару-дарманну бувссар.
ХIакин Камаловлун тачIаввагу къаххирасса бивкIун бур къашайшалт «аьркинминнайх ва къааьркинминнайх», «лайкьминнайх ва къалайкьминнайх» бачIлан. Гьарцагу къашайшалах гъирарай вичIигу дирхьуну, ганал дакIниймургу лалавсун, дакI данмургу бусаву – му хIакиннал лахъа-хъуншиврул ца лишанни.

Шамсуттин МухIсинович хъинну авкьусса, ссавур дусса, аькьилсса, къудуршиву цирив къакIулсса хасиятрал инсан ивкIун ур. ДакIнил хъиншивруцIун ванал хасиятраву кьянкьашивугу ва цаятурасса тIалавшиннагу хъуннасса диркIун дур. Даврий жаваблувсса пишакар акъассагу, Шамсуттин кулпатраву ургъил-къулагъас дан кIулсса ппу ва хъунбутта ивкIун ур.

Къабигьасса оьрчIшиву диркIун дур Шамсуттиннул. Мунияту захIматрал кьиматгу кIулну, ванал цала гужгу, бюхъугу гихуннайсса цала дуккаврин, кIулшивуртту ласаврин хас бувну бур.
1961 шинал Дагъусттаннал медициналул институтгу къуртал бувну, Шамсуттиннул, таний­сса чIявусса жагьилтурал кунна, кIира шин дурну дур «Целиналий». Лайкь хьуну ур оьрмулуву цала цалчинсса, «За освоение целинных земель» тIисса, медальданун ва Къазахъисттаннал ЦК компартиялул чулухасса ХIурматрал грамоталун.

Яла зана хьуну Дагъусттаннайн, зун ивкIун ур Ккурклив участокрал азарханалул хъунама хIакинну. Хирургиялул пишакаршиву лархьхьуну махъ Азирбижаннал хIакинтурал кIулшивурттал даража лахъ бай­сса институтрал кафедралул хъунаману зий ивкIсса МахIаммадхан Къажлаевлул (машгьурсса композитор Мурад Къажлаевлул ппу) оьвкуну, отоларингологнал пишагу тимар бувну бур ванал.
Зана шаврицIун, Гъумучиял райондалул азарханалий хирургну ва лор-хIакинну зун ивкIун ур.

МахIачкъалалив ивзун махъгу зий ивкIун ур шагьрулул 2-мур азарханалий лорну ва ДГУ-лул граждан обороналул кафедралий студентътурахь медициналул дарсру дихьлай.
1966 шиная 1969 шинайннин Пироговлул цIанийсса Москавуллал 2-мур мединститутрачIасса клиникалул аспирантурагу къуртал бувну, оьрчIал отоларингологиялун хасъсса диссертациягу дурурччуну, МахIачкъалалив Муххал ххуллул азарханалучIасса лоротделениялул хъунаману зун ивкIун ур.

Медициналул аралуву бивхьусса захIматрахлу Ш. Камаловлул «ДР-лул лайкь хьусса хIакин» тIисса цIа хIалал дурну дур. ЧIявусса операцияртту бувну бур Шамсуттиннул цува зузиссаксса хIаллай. Мунияту ва кьамул увну ивкIун ур пластический реконструктив ва эстетикалул хирургтурал сакиншиндарал (ОПРЭХ) ва Аьрасатнал медико-техникийсса элмурдал академиялул (РАМТН) мяйжаннугусса вакилну.
1992 шиная 1994 шинайн ияннин Шамсуттин Камалов Яманинал республикалий Таис тIисса шагьрулийсса паччахIнал клиникалий лор-хIакинну зийгу ивкIун ур. Мукуна тиккусса жагьилсса пишакартурахь дарсругу дихьлай ивкIун ур.
Ххирану ва бусравну ивкIун ур Шамсуттин цала КIулушацIрал жяматрал дянивугу.

Буттахъал ххуллу язи бугьан лявхъусса наслугу – мугу ца хъунмасса талихI хъанай бур. Ванал арс Илдардуя, Дагъусттаннай акъа, мунил кьатIувгу цIа ларгсса пластикалул хирург хьуну ур. Шамсуттиннул кIилчинма арс надир­сса ва авадансса чIунил заллу­сса балайчи, Дагъусттаннал опералул театрданул цIанихсса артист, МухIсин Камаловлул цIа тIурча, къабавссавагу акъахьун­ссар цучIав. Аида, Хануля, Асият ва Шамсуттин тIисса оьрчIал оьрчIалгу хъунмяммал пиша язи бувгьуну бур.

ЧIявур Шамсуттин Камаловлул оьрмулиясса дакIнийнбичавуртту ва ванащал архIал зий бивкIминнал ва дакIнийн утлатисса аьпалул махъру. Гьарнал дакIурдивугу ва личIантIиссар ххаллилсса хIакин ва хъинсса хасиятрал заллу хIисаврайгу.