[dropcap]М[/dropcap]артрал 23-нний Республикалул Халкьуннал творчествалул къатлуву хьунни «Мусил ххал» цIанилусса мастер-класс.
Бадрижамал Аьлиева
Республикалул Халкьуннал творчествалул къатлул пикри бувну бия цалла давуртту ккаккиялун нажагь дакъа къадишайсса Оьргърал (Кубачи) хъаннил аьвзалзаманная шихуннайсса усттаршиву ккаккан дуллалисса батIаву дуван.
Мастер-классрал давривух гьуртту хьуна искусствовед, РДНТ-лул пишакар Татьяна Петенина, Дахадаевуллал райондалийсса Оьргърал шяраваллил ОьрчIал искусствалул школалул дарсдихьулт Фатима Кишова, ПатIимат Абакарова, Мадина Саидова, РАН ДНЦ-рал ИАЭ-лул институтрал элмийсса зузала Фатима Гаджалова.
Мастер-классрайн бувкIун бия республикалул шагьрурдал ва районнал культуралул центрдал, искусствалул школарттал вакилталгу, миннавух – Лакрал ва ЦIуссалакрал районнаяссагу.
Татьяна Петенинал цилвамур ихтилатраву кIицI лавгунни мусил ххаллай щащаву аслийсса канил пишардал вайми журардал чIарав дихьларчан, масалдаран, ичIува аьркин шайсса, чIюлушиндаран бакъа, гъилишиврунгу ишла байсса бартбисурттал, му – нажагьссаннаща дакъа ишла дуван къашайсса, багьлул ххирасса чIюлушин диркIшиву ва уттигу душиву, цанчирча мусил ва арцул ххаллу архния ларсун бучIайсса бивкIун тIий.
ХIакьинусса кьини яла машгьурну дусса дур бакIрайн дутайсса «кIаз» лачак щащаву. Мукунсса карщив чIаххувсса шяраваллавусса даргири ва яру душваралгу дутайсса диркIун дур, амма, оьргърал душварал дакъа, цайминнал ми авадансса накьичирттайну чIюлу къадайсса диркIун дур. Ми никирая никирайн диян дайсса диркIун дур, буттукьирттаву ядуллай. ЦIанагу оьргърал жалиндалучIа, му шагьрулийсса бунугу, шяраву бунугу, чара бакъа дикIан аьркинну дусса дур «кIаз-лачак».
Шагьрулий уттизаманнул пурмалийсса жалин гьухъри лаххарчагу, хъиривмур кьини жалин барча буван гъанчу бувкIсса чIумал, чара бакъа лаххайсса бур ласнал ниттил буллусса тафталул ятIул гьухъа ва ялттуруту-карщи, цахъи махъ тIурча – цилламур ниттил пишкаш бувсса парчалул гьухъа ва «кIаз-лачак». Ниттил дуллуми янна никирая никирайн, ниттия душнийн дияйсса дур. Дагъусттаннал халкьуннал канил пишардал мастер-классру ялунмайгу буллантIиссар.
