Шанна диндалул дякюру

Ва зурул 2-нний Дарбантлив, «Келе-Нумаз» синагогалуву, чIявусса хъамалгу бавтIун, дунни ягьудинал байран.


Му шадлугу барча дуван бувкIун бия Дагъусттаннал динийсса иширтталсса буллалисса комитетрал хъунаманал къуллугъ чIумуйну биттур буллалисса МахIаммад АьвдурахIманов, Дарбантуллал мэрнал къуллугъ чIумуйну бартбигьлагьисса Энрик Муслимов,

Республикалул муфтиятрал вакил Аьдил Ибрагьимов, протоиерей Николай Котельников, Дагъусттаннал ягьудинал ккурандалул правлениялул хъунама Валерий Дибияев ва цаймигу бусравсса инсантал.

Дарбантуллал ягьудинал ккурандалул хъунама Роберт Илишаевлул, синагогалувух экскурсиягу бувну, бувсунни ягьудинал нукIузаманнул аьдатирттая, ккаккан дунни музейрал экспонатру, миннувух – Буттал кIанттул цIанийсса дяъвилий жанну дуллусса вирттаврал суратругу. Роберт Илишаевлул дурккунни Аьрасатнал хъунама раввин Берл Лазардул ва Аьра­сатнал ягьудинал ккураннал Федерациялул президент Александр Бородал барча буллали­сса телег­раммарду.

МахIаммад Аьв­дурахI­ма­новлул цалвамур ихтилатраву кIицI лавгунни МахIачкъалаллал ва Дарбантуллал ягьудинал ккуранну мудангу чялишну хIала духхайшиву республикалул оьр­мулуву хъанахъисса иширттавух, бусурманнал ва ххачпараснал культуралул мероприятиярттайгу гьуртту шайшиву, чIявусса миллатру бавкьуну яхъанахъисса республикалий миллатру, динну личIи дуваву къадикIантIишиву.

Бусурманнал ва ххачпара­снал диннал идарарттал вакилтуралгу чIурчIав дунни Дарбантуллал шагьру шанна диндалул дякюруну хъанахъишиврий, гьарцагу диндалул агьулданул хIурмат буну къуццу тIун аьркиншиву мукьахунмайгу.

«Жасмин» тIисса къавтIаврил ансамбльданул ва 17-мур садикрайн заназисса мюрщултрал ккаккан дунни концертрал программа. Байрандалийн бавтIсса хъамаллуран сахаватну къур бувну бия хъинсса ахттайнссаннул ссупрагу.