ОьрчIру ххираминнал пиша

ЦIуссалакрал райондалийсса Чапаевкаллал шяравусса Солнышко» садикрай хьунни яла хьхьичIунмур тарбиячи язи угьлагьисса конкурс. Шикку гьуртту хьунни ЦIуссалакрал шяравусса «Буратино»,Чапаевкаллал шяравусса «Солнышко», ЦIуссаккуллал шяравусса «Дюймовочка»,цIуминалийсса ЦIуссалакрал шяравусса «Сказка», цIуминалийсса ЦIуссачIурттащиял шяравусса «Радуга№1» ва ЦIуссачIурттащиял шяравусса «Радуга» багъирдал тарбиячитал ва каялувчитал.


Имара Саидова
Конкурсрал даву дайдихьлахьисса ва ххув хьуми барча буллалисса давриву гьурттушинна дунни ЦIуссалакрал райондалул бакIчинал хъиривчутал Алик Исрапиловлул ва ХIажи ХIажиевлул.

Тарбиячитурал пишалул магьиршиврун кьимат бишлашисса жюрилуву бия КIулшивуртту дулаврил управлениялул хъунаманал бигарду биттур буллалисса Ирина Разуева, управлениялул хьхьичIунсса пишакартал Светлана Рамазанова ва Мисиду Шагьмандарова.

Цинявппагу ва конкурсрай гьуртту хьусса тарбиячитурал цанна ккаккан дурсса дарсру дирхьунни Чапаевкаллал шяравусса «Солнышко» садикрал оьрчIахь.
Конкурсрал даву най дия кIива гьантлий. Цалчинмур кьини тарбиячитурал ккаккан бунни мастер-классру, кIибавчIунни цала даврил опыт.

КIилчинмур кьини дирхьунни педагогшиврул усттаршиву аьч дуллалисса дарсру.
Жюрилун хъинну захIматну бия гьунар бусса, цаннаяр ца итххявхсса тарбиячитурал даврин кьимат бищун. Конкурсрай цалчинсса кIану бувгьунни ЦIуссалакрал шяравусса «Буратино» садикрал тарбиячи Амина Ханиговал, кIилчинсса кIану – Чапаевкаллал «Солнышко» садикрал тарбиячи Эмилия Муслимовал ва шамилчинмур кIану – ЦIуссалакрал шяравусса «Сказка» садикрал тарбиячи Мариям Расуловал.

Шиккува кIицI лаган, конкурсрал даву лавайсса даражалий шаву мурадрай, хъунмасса захIмат бивхьуну бия «Солнышко» садикрал хъунмур Оксана Исмяиловал.