ОьрчIансса цIусса азархана

МахIачкъалалив, Рашид Аскерхановлул цIанийсса Медициналул центрданий, булувкьуну оьрчIансса корпусгу буллай бур. КIицI лавгсса центр хIакьину Дагъусттаннай ца яла хьхьичIунмур азархана хъанай бур, ттизаманнул хъинсса оборудованиялул дузалсса.Бувну бур му 2002 шинал Халкьуннал Мажлисрал депутат, медициналул элмурдал доктор, профессор ХIамид Аскерхановлул.


П. Рамазанова
Мяйжанссар, ва паччахI­лугърал азархана бакъар, Ух­ссавнил Ккавкказнаву па­ччахI­лугърал биялдарай бакъа­сса медициналул яла хъунмур центр­­гу ва бусса бур. Ванил ляличIишивугу личIи-личIисса отделенияртту бушавур, сайки ччимур журалул азарду хъин дуллалисса хIакинтал зий бушавур. Аьмну зий усса ур 250 инсан. Гьар шинах 28 миллион налогирттал дулайсса дур.

— Махъсса кIира шинай жучIа зий буссар «Анаварсса кумаграл» машинарттугу, МахIачкъалаллал ва республикалул агьалинан кумаг буллалисса. Оьвкуну шаппай бучIан бувайссар «Анаварсса кумаграл» бригада, мукунма къашайшалт биян бувайссар Москавуллал, Санкт- Петербургуллал, Аьшттарханнал, Ростовуллал азарханардайн, — тIий ур ХIамид Аскерханов.

КIира шинал хьхьичI шиккува буллай байбивхьуну бур арулла зивулийсса цIусса корпус, миву бикIантIий бур оьрчIансса поликлиника ва стационар. Му бакъассагу, корпусрал магъуй бувантIий бур вертолет ликкавансса майдангу, зунттаву ва шагьраххуллурдай бала- апатIру хьувкун, хъирив дуккавансса. ОьрчIансса азарханалийгу лавайсса даражалий дикIантIий дур диагностикалул давугу, буллантIий бур захIматсса операциярттугу.

Ттизаманнул ххуйсса техникалул дузал бувантIий бур азархана, Москавуллал, Санкт- Петербургуллал цIанихсса азарханардая тIалав бувантIий бур даву ххуйну кIулсса хIакинталгу. Шиккува кIицI лаган, Европанаву, авария хьусса чIумал, ягу цамур бала-апатI хьутари га­ссят вертолет дучIан дурну, биян бай къашайшалт азарханардайн. Журналистътурал суаллахьхьун жавабру дуллай, министрну зий ивкIсса Танка Ибрагьимовлулгу тIайланма увкуна вертолет ласунсса каши министерствалухь дакъар куну. Вертолет чара бакъа аьркиншивурив гьарманан кIулли.

Гьай- гьай, цIуру-кIурулий бур агьали, центрданул багьригу хъунисса бур тIий. Амма паччахIлугърал азарханардайгу украсса медицина дакъашиврийгу мукIру хъанай бур. Багьлух­сса клиникардугу чансса бакъар. Бур оьрчIанссагу. Къулаймур азархана язи бугьансса сант душавугу хьхьичIуннайшивур. Ва ялагу, паччахIлугъралмур медицинагу вара бюхъулий ва бущилий хьхьичIуннай хъит учинссар тIисса умудгу къакьукьинну.