ЦIаннай къаличIланшиврул

Апрель зурул 4-нний Новостройрай ялапар хъанахъисса ТIюхчардал шяраваллил агьали чIаравсса федерал ххуллу бахIин бувккун бия.Вай инсантурал хху­ллу бахIин буккаврил сававгу хьунни, ччя-ччяни ва хъунмасса хIаллай чани лешлай, азурда хъанай бушиву.Полициялул зузалт бувкIун махъ инсантурал ххуллу тархъан бунни. Дагъусттаннал прокуратуралулгу махъ буллунни агьалинал чулухасса аьрзардал хъирив лаяву дан.

И. Саидова
Ва акция хьуну махъ ДР-лул Халкьуннал Мажлисрал депутат Амирхан Амирханов хьунаавкьунни ДР-лул аьрщарал ва имуществалул иширттал министр Екатерина Толстиковащал. Микку гьуртту хьунни ЦIуссалакрал райондалул каялувчиталгу. Толстиковал махъ буллунни анаварсса мутталий ЦIуссалакрал райондалийсса электросетру «Дагэнерго» компаниялухьхьун дулун.

Депутатнал мукунма бувчIин бунни цIанасса чIумал Новостройрайсса цинярда электросетру Дагъусттан Республикалул Аьрщарал ва имуществалул иширттал министерствалул балансрай душиву.

— Вай электросетру «Дагэнерго» компаниялул балансрайн лахъан дарчан, чани лещаврил масъала сайки дузал хьунтIиссар, — бувчIин буллай ур Амирхан Амирханов.