ДР-лул Халкьуннал Мажлисрал Председатель Хизри Шихсаидовлул Миллатирттал дянивсса арардал, жяматийсса ва диннал цачIуншивурттал иширттал комитетрайн тапшур бунни хIадур дуван «ДР-лул миллатирттал мазурдил хIакъираву» тIисса закондалул проект, ва зуруй хьунтIисса сессиялий цалчин дурккуну ххал дигьиншиврул.
Апрельданул 3-нний МахIачкъалалив хьунни «ДР-лул мазурдил ляличIишивуртту: проблемартту ва ялун бучIантIимур» («Языковое разнообразие Республики Дагестан: проблемы и перспективы») тIисса парламентрал батIаву. Муний гьуртту хьунни республикалул парламентрал депутатътал, министерстварттал ва ведомстварттал вакилтал, СМИ-лул каялувчитал ва цаймигу.
ДР-лул парламентрал председательнал хъиривчу Елена Мельниковал бусаврийн бувну, ниттил мазру ябаву – ляличIину агьамсса темар, Дагъусттан кунма, чIявумиллатру бусса региондалун. Цанчирча школалий дуклаки оьрчIал хIарачат буллай бур чил билаятирттал мазру лахьхьин, амма ниттил мазру лахьхьаврих къулагъас лапра чан дурну дур.
Дагъусттаннай ниттил мазру буруччаврил масъаларттах цуксса къулагъас дуллай бурив, муксса цалий дарцIусса тагьар дикIантIиссар Дагъусттаннайгу, щалва Аьрасатнавугу. МуницIун бавхIуну бур оьрчIру тарбия баврил, аьдат-эбадатру ва культура сахла даврил масъаларттугу», — увкунни мунил.
Республикалул миллатирттал политикалул му ххуллий дуллалисса давурттая бувсунни ведомствалул бакIчинал кIанаймур Татьяна Гамалейл. Мунил бусаврийн бувну, му министерствалул кабакьаврийну ДГУ-раву дузал бувну бур ниттил мазру лахьхьаврил центр. Дагъусттаннай цIана бур 32 маз. Гъансса мазру цачIун бувну бур ца группалувун – яруссаннал, къумукьнал, лазгиял, лакрал ва цаймигу. Миннуя сакин хьуну бур хъунисса, чIявучин ишласса 14 маз. Миннул дур цалва литература, кказитру, телевидение, радио, театрду, элмулул терминну.
ЦIуну чичлай байбивхьусса (младописьменные) мазру – агъуллалсса, рутуллалсса, цIахъюрдалсса хьхьичIунмай итххяхлай бур лапва хIаллих.
ДНЦ-лул Магьирлугърал, мазрал ва литературалул институтрал хъуна-хъунама элмийсса зузала МахIаммад МахIаммадовлул бувсунни республикалул мазру тарихраву личIи-личIисса заманнай цукунсса тагьарданий бивкIссарив.
Мазурдил хIакъираву законшиврул гьану щаллусса бакъашиврия ихтилат бунни парламентрал депутат ХIамидуллагь МахIаммадовлул.
Мува масъалалул хIакъираву ихтилатру бунни батIаврий гьуртту хьусса цайминналгу.
Масъала ххал бигьаврил хIасиллу дуллай, Хизри Шихсаидовлул бувсунни му масъала хъинну агьамсса бушиву жула региондалун. Мунал депутатътурайн тапшур бунни мазурдил закондалул проект хIадур дуван, ва зуруй хьунтIисса сессиялий ххал дигьиншиврул.
ХIадур бувссар
ХI. Аьдиловлул
