Дагъусттаннал КIулшиву дулаврил ва элмулул пресс-службалул баян бунни республикалул школарттай биял къахъанай бушиву ниттил мазурдил учительтал.
П. Рамазанова
43 учитель аьркинну усса ур хIакьину, хаснува учительтал биял къахъанай бур Къизлярдай, 12 учитель аьркинну усса ур. ПаччахIлугърал федерал кIулшивурттал стандартрайн бувну, ниттил мазрал ва литературалул дарсру ларсун дуссар чара бакъа лахьхьин аьркинсса пландалийн.

Мукунма, Дагъусттаннал КIул­шиву дулаврил закондалийн бувнугу, школарттай ниттил мазрал ва литературалул дарсру кка­ккан дурну дуссар чара бакъа ла­хьхьинми предметирттавух.
Амма, пресс-службалул бусаврийн бувну, региондалул школарттай биял къахъанай бусса бур учительталгу, аьркинсса луттирдугу, пособиярттугу. Ва кIану хIисавравун лавсун, КIулшиву дулаврил министерствалул ниттил мазрал дарсру дихьлансса вузирдал выпускниктал кIункIу бувансса пикри бусса бур.

Вайва масъаларттаха зий бур КIулшиву ласаву хьхьичIуннай дуллалисса Дагъусттаннал институт (ванийн институт развития образования учай) ва А. Тохо-Годил цIанийсса Дагъусттаннал педагогикалул НИИ. ЦIусса дуккаврил шинал дайдихьулий жу вай масъалар­тталсса буллан буржлувминнащал хьунабавкьуну, иш-тагьар цукунсса дуссаривгу балжийну бусанну.