Ккуллал райондалиясса хаварду

Дурусну апрельданул 6-нний барз бартлавгунни Ккуллал райондалул бакIчинал буржру биттур буллай Рамазанов Шамиллул. Ва мутталий ва кIул хъанай ия райондалул иширттащал, хьунаавкьунни цаппара идарарттал зузалтращал, дурунни налогру дулаврин, мюхчаншиву дуруччаврин ва цаймигу ишир­ттан хас дурсса батIавуртту.

* * *
Апрель зурул 3-нний Шамил Рамазанов хьунаавкьунни райондалул учительтуращал. Му хьунаакьаврий ванал чIурчIав дуруна:
— ХIурмат лавайсса учительтал! На идарарттал зузалтращал кIул хъанахъаву дайдихьлай ура педогогтурая. Педогогтурал коллектив бур райондалий яла чIявусса зузисса инсантал бумур. Зул каруннихь буссар яла буруччин багьлагьими, ххирами инсантал – дуклаки оьрчIру. Зу цукун­сса кIул­шивуртту дуллурив, цукун­сса гьану бивзрив, мунийри яла миннал «къатри» дуллантIисса. ХIакьинусса учениктал – ми жула ялун бучIантIимурди, — куна ванал.
Шиккува учительтурал гьаз бувна учительтурал ва школарттал дянив хьунадакьлакьи­сса диялдакъашивурттал ма­съалагу. Учительтал бугьара хъа­най, вайннан кIанай зунсса жагьилсса учительтал зунттавун къанай бушиву кIицI бувна Ккуллал цалчинмур школалул хIисаврттал учитель Исакьов МахIаммадлул. Вихьуллал школалул ниттил мазрал учительница Зарета МахIаммадовал гьаз бувна буллай бачIину ливчIсса Вихьуллал цIусса школалул къат­ри зия хъанай най душиврул масъала. Ванил тавакъю бувна райондалул бакIчинахь ва иширал хъирив лаян. Муния махъ Шамил Рамазанов ялтту увккуна Ваччиял школалул классир­ттавух ва оьрчIал багъравух.

* * *
Апрель зурул 4-нний Шамил Рамазанов хьунаавкьунни райондалул азарханалул зузалтращал. Хьунабакьаврил мурадгу бия райондалул жямат­рал цIуллушиврул ялув цукун бавцIуну бурив, медициналул зузалтрал давурттаву ци диялда­къашивуртту хьунадакьлай дурив кIул баву.
Цала ихтилатраву Шамил Рамазановлул увкуна:
— Жулла хьунабакьаву на хас дуллай ура зущал кIул шаврин. Ттун мукунма ччай бур зуяту бавну зула буруккинттарая ва зула давриву хьунадакьлакьи­сса захIматшивурттая. Медиктурал тIутIисса куццуй, тIайлану дирхьусса диагноз хъанахъиссар къашайшала хъин аврил дайдихьуну. Тарсшивуртту, цалла хасиятрал кьянкьа-кьурчIисса лишанну аьркинссар азарханалул дарвазалухра кьадитан, — куна ванал.
Муния махъ ванал вичIи­дир­хьуна хьунабакьаврийн бувкI­­­миннах.
Ихтилатру бувна Кьубатаев Аьлил, Шамхалов Гьаруннул, Абакаров Камиллул, Шамхалов Кьурбаннул ва цайминналгу.
Мунияр махъ азарханалул хъу­нама хIакин Сулайманов Сулайманнущал Шамил Рамазанов азарханалул ялтту увккуна.