«Краснодардал» тренер игьалаган гьан унни «Анжилул»

[dropcap]А[/dropcap]прельданул 1-нний Краснодар шагьрулий Аьрасатнал футболданул чемпионатрал лагрулий данди дурккунни «Краснодар» ва «Анжи» командартту.


Руслан Къардашов
ТIуркIулул дайдихьу хьунни гьайжаклий бигьлагьисса куннасса. Гьужумрал щатIи жагь «Анжилул», жагь «Краснодар» командарттал къапурдал чулухунмай бишлай бия. ТIуркIулул 33-мур минутIрай «Анжилул» къапулуя арх бакъа,

«Краснодардал» ялун — мюхчанчи (полузащитник) Классоннул биривсса ттуп, цала зумунусса увинтругу дурну, гьан бувунни «Анжилул» къапулувун.
КIилчинмур таймрайгу нигьачIин дусса лахIзарду хьу­нни муттаэтурал къапурдал хьхьичI. Мува Классоннул бивщусса ттуп жулва къапулул ялтту лавгунни. «Анжилул» гьужумчи Лесканол, бакIрах ишан ларсун, бивщусса ттуп тIайла бавцIунни къапулул ттурцIайн.

ТIуркIулул ялун ххи дурсса чIумуй «Анжилул» бивхьусса хIарачат барачатрай бувккунни: Лесканолуя биривсса ттуп жула ялун мюхчанчи Данченкол запI чин бунни «Краснодардал» къапулувун. Ахиргу хьунни ничья 1:1.
Ва кьини хъярч-махсаралул дунугу, «Краснодар» командалул тамашачитураща хIаз ласун къавхьунни, ххишалдаран миннал хъунама тренер Игорь Шалимовгу цала къуллугърая укьан увунни.

«Анжилул» хъиривмур тIур­кIу хьунтIиссар апрельданул 8-нний Каспийск шагьрулий Аьра­сатнал футболданул чемпион Москавуллал «Спартакращал».
«Краснодар» —
«Анжи» — 1:1.
Голлу: Классон, 33 (1:0); Данченко, 90+4 (1:1)
«Краснодар»: Синицын, Петров, Мартынович, Гранквист, Калинин, Шатов, Перейра, Каборе (Газинский, 53), Мамаев (Жоазиньо,69), Классон, Смолов (Вандерсон, 85)
«Анжи»: Лория, Данченко, Самарджич, Брызгалов, Полуяхтов, Хамрамов (Яковлев, 69), Тетрашвили, Бакаев (Прудников, 83) , Лескано, Маркелов, (Хубулов, 57), Бурковский.