Дайдирхьунни аьралуннаву къуллугъ буллан жагьилтал буцлансса даву.
Апрельданул 1-нний, комиссиялул даву дайдишин хьхьичI, призывниктуращалсса хьунаакьаврий комиссиялул председатель, райондалул бакIчинал буржру биттур буллалисса Рамазанов Шамиллул кIицI бувна:
— Армиялийн къуллугъ буллан лагаву мудангу жула райондалиясса жагьилтурал сийлийсса къуллугъну бивкIссар, хьхьичIунсса цIанин лайкь шайсса бивкIссар. Умуд бур зугу дуруччинссар жулла марка тIисса, — куну.
Ихтилат бувна аьрали комиссар Масуев ХIасаннулгу.
— Дагъусттанная гьашину уцин ккаккан увну ур 1350 жагьил. Ккуллал ва Лакрал райондалиягу ккаккан увну ур 15 призывник. Цалчин буцинтIиссар бугьарами, яла – лахъсса кIулшиву думи ва аьрали-сияхIрай касму думи. Вай бакъагу, ялагу уцинтIиссар 35 призывник контрактрал лагрулийсса, — куна ванал.
Апрельданул 11-нний Ккуллал райондалул шяраваллаву дурунни субботник.
Ва кьини Ккуллал райондалул администрациялул жагьилтурал ва туризмалул иширтталсса байсса пишакар Аьбдуллаев Абуссупияннул сипталий марцI бувунни Ваччиял шяравусса стадион. Ва бакьин бувансса, трибунартту бансса арцу итадакьин ккаккан бувну буссия шиннардил хьхьичIва. Амма, экономикалул иширттацIун бавхIуну, махъун бутлайнма бур. Цукун бухьурчагу, Абуссупияннул жагьилтал бавтIун, дуруна ххуйсса даву.
ХIажимурад ХIусайнов
