«Жул муштаритурал арцу мюхчанну дуссар»

АлхIаткьини республикалул МФЦ-лул хъунмур идаралий «Сбербанк» ПАО-рал Дагъусттаннайсса отделениялул каялувчи Дмит­рий Артемовлущалсса пресс-конференция хьунни. Микку ялагу гьуртту хьунни ДР-лул маэшатрал министрнал хъиривчу ХIажи Султанов ва ДР-лул МФЦ-лул хъунама МахIаммадамин Арсланаьлиев.


З. АьбдурахIманова
Шикку журналистътурахь вайннал бувсунни 2017 шинал республикалийсса отделениялул давриву хьусса дахханашивур­ттая, ккаккиярттая, ва шинал дан дакIнийсса давурттая.

«Жула региондалий «Сбербанк» ккаллийссар ца яла хъунмасса, налог дулун бюхъайсса идаралун. Ларгмур шинал, масалдаран, банкрал бюджетравунсса налогирттал 465 млн. арцул буллуну бур.

Республикалул халкьуннавасса гьарца шамилчинсса инсан жул муштари хъанай ур. «Сбербанк» мукунма республикалул агьамсса инвесторнангу хIисавссар. «Сбербанкрал» чIарахбацIаврийну региондалий 1678 миллиардрансса инвестициялул хъуни-хъунисса проект­ру щурущи дурссар», — бувсунни Дмитрий Артемовлул.

КIицI бунни ванал халкьуннал дигьалагрулун ларгсса шинал республикалул цаппара зун­ттал районнай банкоматру бивхьушиву ва офисру тIивтIушиву, мукунма укунмасса халкьуннаща кредитру ласун бюхъаврил давугу къулай дуршиву.

«Жу жула муштаритуран хъи­н­ну бигьа дуварду арцущал, кредитирттащал дархIусса даву. ХIакьину жул кредитирттал рынокрай укунмасса халкьуннал 58 % бур. Региондалий халкьуннал 80% цалла арцурду жуйн вихшала дуллай бур», — бувсунни ванал.

Пресс-конференциялий журналистътурал къулагъасралун ХIажи Султановлул лавсунни бюд­жетрал идарарттай зузисса халкьуннал харжру «МИР» карточкарттайн бичаврил хIакъи­равусса ихтилат.

«Ва проектрал мурад хъанахъиссар «ххютулусса» маэшатрал хIакъи-хIисавртту аьч дуваву. Мисалдаран, проект цила багьайкун щурущи дуварча, идарарттал, ведомстварттал, муниципал сакиншиннардил каялувшиндарахь «наличкалучIансса» ххуллу кьукьлакьиссар.

ЦIана жул мурад бур ялу-ялун халкьуннал онлайн-сервисру ишла дуллали буллай, вардиш булланссагу. ЗунтIиссару халкьуннал ЖКХ-лущал ва цаймигу идарарттащал арцуцIун бавхIуми операцияртту онлайн-сервисирттайхчIин щаллу буллансса шартIру дуваврил ялувгу», -бувсунни ванал.
Дмитрий Артемовлул кIицI бувунни банкрал хъуннасса даву дуршиву халкьуннан ипотекар­тту дулавривугу.

Ванал бусаврийну, ипотекартту утти ласлан бюхълантIиссар онлайн-сервисрал кумаграйну ва процентрал арцугу зана дуллан бю­хъантIиссар банкрал офисрайн къалавгна. Ларгмур шинал ипотекалун банкрал 10 миллиард арцул итабавкьуну бивкIун бур, гьашинугу 2,5 -3 миллиардрал ххи бан тIий бусса бур.

Кибератакарттал хIакъираву «Сбербанкрал» хъунаманал бувсунни банкрал хъуннасса къулагъас дувайшиву цала муштаритурал арцул мюхчаншиврух.