[dropcap]М[/dropcap]артрал 23-нний Избербаш шагьрулул Культуралул къатлуву хьунни Республикалул ХVI халкьуннал театрдал «Наследие» тIисса цIанилусса фестиваль. Мунивух гьуртту хьунни республикалул районнаясса халкьуннал театрду ва оьрчIал театрданул коллективру, миннавух – лакрал районнаямигу.
Бадрижамал Аьлиева
[dropcap]Ф[/dropcap]естиваль сакин дурну дия ДР-лул Культуралул министерствалучIасса Республикалул Халкьуннал творчествалул къатлул Избербаш шагьрулул администрациялул культуралул отделданущал цачIу.
Фестиваль хас дурну дия Дагъусттаннал халкьуннал шаэр Расул ХIамзатовлун 95 шин шаврин.
ХьхьичIмахъ лавхъуна Избербаш шагьрулул администрациялул бакIчинал хъиривчу Хизри Халимбековлул:
— ХIакьину жучIанма хъамалу бувкIун бур жулла республикалул 15 райондалиясса творчествалул коллективру. ЧIявумиллатру бусса Дагъусттаннай ялапар хъанахъисса жунна хъамаритлан къабучIиссар гьарцаннал цалла-цалла аьдатру душиву. ХIакьину куннасса давуртталгу кумаг буллалиссар кувннан кув бувчIин, кувнначIан кув гъан буван, — куна ванал.
Махъру ялагу лавхъуна шагьрулул культуралул отделданул начальник ПатIимат Гъазиевал, Республикалул Халкьуннал творчествалул къатлул отделданул пишакар Минажат Мурадовал.
Гихуннай театрдал ккаккан дуруна Р. ХIамзатовлул цIаницIун, творчествалуцIун дархIусса постановкартту.
