Цин лархьхьусса хIадуршинна

[dropcap]А[/dropcap]прельданул 20-нний Аьли Аьлиевлул цIанийсса Спортрал къат­раву хьунни лачIун буккаврил Европанал чемпионатрайн хIадур шаврил сакиншиндарал комитетрал ярглийсса батIаву. Муний гьуртту хьунни АьФ-лул ПаччахIлугърал Думалул депутат Александр Карелин, АьФ-лул ЛачIунбуккаврил федерациялул президент Михаил Мамиашвили, вице-президент Оьмар Муртузялиев, Георгий Брюсов ва цаймигу.


[dropcap]Б[/dropcap]атIаврий махъ лахълай, ДР-лул ХIукуматрал председательнал 1-ма хъиривчу Анатолий Карибовлул бувсунни хIакьину Европанал чемпионатрайн хIадур хьуну бушиву. «Жу бакьин барду циняв 36-гу патирхана, миннуву хъамал бацIантIиссар.

Бяст-ччаллу тIитIаврилсса буллантIиссар «Союз-Аrt» тIисса Москавуллал компаниялул. Мукунна дузал дурну дур пресс-центрданул даву. Хъуннасса къулагъас дуллай буру мюхчаншиврул масъалалух», — увкунни Карибовлул.
Федерациялул президент Михаил Мамиашвилил бувсунни сакиншиндарал комитет­рал хьхьичI бивхьуну бивкIмур хъунмурчIин дузал бувну бушиву.

БатIаврий махъ лавхъунни 3-ла олимпий чемпион Александр Карелиннулгу. «Жу Да­гъусттаннайн бувкIун хIакьину 2-мур кьинир, жу лахьхьу лавгру Дарбантливгу, тамаша бансса кIанттурду тамансса бур. Чемпионатрайн ххуйну хIадур хъанай бур», — увкунни Карелиннул.

Георгий Брюсовлул бусаврийн бувну, Украиннал лачIунбуккулт бучIан тIий бур чемпионатрай гьуртту хьун.
Оьмар Муртузялиевлул пик­рилий, республикалий дузал буван аьркинну бур ЛачIун буккаврил академия, тренертал хIадур булланшиврул.