Март зурул 25-нний зунттавусса Карашрал
шяраву хьунни Хъурдаккаврил байран.
Гьашинусса Хъарас щаврил Хъун-Хъузалану ия СултанмахIаммадлул арс ХанмахIаммадов Руслан. Буттал шяраву лавну миналулгу хьуну, цIусса къатригу дурну, ризкьи-кьинилул хъуннасса хозяйствагу нани дурну, захIматрая хIучI къаучайсса, буттал аьрщарай ца барачат ххину ялапар хъанахъисса инсан ур Руслан. Му бакъассагу, ва ур канил пишалул итххявхсса усттаргу, дукъавайсса даву дакъар.
Хъарас щаврил кьинилийн бувкIун бия шяраваллавассагу, шагьрурдаяссагу хъамал, дустал, гьалмахтал. Цал Карашрал шяраваллил мизитрачIа, хъирив хIатталличIа дуаьрттугу дурккуну, яла щарнил Хъун къурув бувккун, щуна Цалчинсса хъарас. Бартбивгьуна муницIун бавхIусса цайми-цайми мурадругу.
Хьуна яла къабувну тачIавгу къабитайсса дуки-хIачIиялул гьарта-гьарзасса ва буллугъсса ссупралул мажлисгу. Лавхъуна дуаьрттал махъру, дуруна дялахърурду.
ЯлунчIилсса Хъарас щаврил кьуру цахьхьунма лавсунни Карашрал СПК-лул председатель, жяматрал ккурандалул бакIчи, Аьппаслул арс Къаллаев ТIагьирдул.
Бюхъаннав буллалимур! Дюхъаннав ялунсса шин!
Жул корр.
