Заннала увсса учитель

На школалий дуклаки­сса чIумал бикIайва ххуй-ххуйсса учительтал, цала даву къакIулсса къабикIайва. ЦIуллу баннав цив.

ЛивтIуминнал аьпа баннав. Амма бия ляличIиссагу. Миннавух цалчинмур ххуттай ттун кIицI лаган ччай бур Гъумучиял школалий хъунмасса хIаллай математикалул дарс дихьлай ивкIсса Маммаев Нураттин МахIаммадовичлул цIа.
Му жагьилсса учитель (1967-70-ку шинну) жул классрал каялувчинугу уссия, 10-мур классравун ияннин. ЧIун ларгун, винма та чIумал учительтурал тIий бивкIмур бувчIайхту, чIалан бикIай цума цукунсса ивкIссарив.
Нураттин МахIаммадович хъинну гъирарай, шавкь дуну дарс дурчIин дуллан икIайва. Доскалий чертежирттаха, уравненияр­ттаха кIану къаличIайва, доска лишин дежурный ацци атил дан гьан увну, га чIал хъанан ивкIукун, цала каних леххан дурну, цIунилгу чичлай айишайва.
Цала дурчIин дуллалисса дарс къуртал къархьуну дунура, занг рищурча: «ОьрчIрув, переменагу жуллар, щябикIи, та звонок зун ба­къар, та ттунни», — куну, жу щябитайвав, га дарсирал мяъна дурчIин даннин.
Жул классраву ххуйну ла­хьхьайсса, математикалул итххявх­сса оьрчIру буссия, учительнал кьацIлива букканнин цаламур заданиягу дурну, махъминнангу кумаг байсса.
Цува математик ухьувкун, му дарс лахьхьайсса оьрчIругу Нураттин МахIаммадовичлун хъинну ххирая. Миннавух бия: аьпалухьхьун лавгсса Амирханов Аьли (Къажлахъал), Билалов Оьмари (Ккилахъал), Чалавихъал Халункачар; цIана сагъсса Дамаданова Занни, Актау шагьрулий яхъанай бур, АхIмадов Камил (Кама), ялапар хъанай ур Нальчик шагьрулий.
Хъинну кувннащал кув бавкьусса класс буссия жул. Мугу жул классрай каялувшиву дуллалиманал хъунмасса бияла бия.
Нава личIину математикалул хьхьичIун увксса къаивкIнугу, мукьра срокрай Гъумучиял шя­­раваллил бакI дургьуну усси­яв. Миккугу Нураттин Ма­хIамма­довичлул та чIумалсса тарбиялул, чIивисса бухьурчагу, бутIа буссар. Школалий дуклаки­сса чIумал, ттуятува, аьпабиву, личIину рязину къаивкIхьурчагу, армиялияту учIайхту, ттущава шайссаксса хIурмат-иззатгу бувссия на.
Ттуярда хьхьичI ванаясса макьалартту чирчусса гьалмахтурацIунгу акьлай ура. Школалун Нураттин Маммаевлул цIагу дирзун, яла цува оьрмулухун ялапар хъанай ивкIсса кIичIираваллингу цIа дизан лайкьссар тIиссара.
Цинявппагу 1971-ку шинал­сса выпускниктурал цIания
Апанни Макьаев