Гьаз хъанай дур захIматрал пишалул сий

[dropcap]Ф[/dropcap]евраль зурул 27-нний МахIачкъалалив, Дусшиврул къатраву, дайдирхьунни «Жагьилсса пишакартурал» (WorldSkills Russia) региондалул шамилчинмур чемпионат. Шикку гьуртту хьунни 1000-нния ливчусса инсантал.


Имара Саидова
[dropcap]Ч[/dropcap]емпионатрай гьуртту хъанахъиминнал цала-цала пишардан хасъсса костюмирттаву сахIналий ккаккан дунни миллатирттал ва уттизаманнул къавтIавуртту. Мукунма ккаккан дунни чемпионат­рал тарихрая балжину бусласи­сса видео.

Чемпионатрал даву дайдихьлахьисса мажлис тIивтIунни ДР-лул ХIукуматрал председательнал цалчинма хъиривчу Анатолий Карибовлул.

— WorldSkills Russia чемпионат анаварсса мутталий машгьур хьунни Аьрасатнаву ва жула региондалий. Гьашину шамилчинсса шинни ва чемпионатрал давривух жува гьуртту хъанай. Ларгсса шинал захIматрал пишардал чемпионатрал лагрулий рес­публикалий цалчин бувссар цIуллу-сагъшиврул ссуссукьушиву думиннал дянивсса пишардал усттаршиву ккаккан дуллалисса бяст-ччаллу.

Чемпионат жула республикалун хъуннасса агьамшиву дусса хъанахъиссар, цанчирча экономика хьхьичIуннай шаву хъар хъанай дуну тIий усттаршиву ххисса пишакартурайн. Му бакъассагу, чемпионатрал аьл­тту буллалиссар гьунар бусса, зун гъира-шавкь дусса жагьилсса зузалт, — увкунни А. Карибовлул.

ДР-лул захIматрал ва соцразвитиялул министрнал буржру би­ттур буллалисса Расул Ибрагьимовлул цала ихтилатраву кIицI лавгунни чемпионат дуллай байбивхьуния шихунмай захIматрал пишарду язи бугьлагьисса жагьилтал чIяву хъанай бушиву ва ми пишардал сий гьаз хъанай душиву.

Чемпионатрал гьурттучитал барча бунни «Абилимпикс-2017» чемпионатрай цалчинсса кIану бувгьусса Луиза Зязиковал ва пишардал усттаршиврун кьимат бишлашисса экспертътурал.
Республикалул чемпионат­рал давривух гьурттушина дан бувкIун бия WorldSkills Russia су­ккушиндарал каялувчинал хъиривчу Людмила Иванюкгу.

Жагьилтал барча буван бувкIун бия машгьурсса балайчиталгу.
Тамашачитуран хъинну баган ивзуна гьунардучи ва гуж­ккан Оьмар ХIанапиев. Мукунма цила гьунар ккаккан бунни ялун личинтIисса чIавасса балайчи Алина Барановалгу.
Шиккува дакIнийн бутанну жулла республикалий феврал зурул 27-нния март зурул 1-ннийн бияннин пишардал усттаршиву ккаккан дуллалисса бяст-ччал най бикIантIишиву.

Чемпионатрай 16-23 шинавун бияннинсса оьрмулул оьрчIал дянив хьунтIиссар 23 журалул бяст-ччаллу: машинартту бакьин баврил, миннуха къуллугъ баврил, сварка даврил, строительствалул, заргалшиврул, штукатурка даврил ва цаймигу.

JuniorSkills тIисса чIава жагьилтурал дянивсса пишардал усттаршиву ккаккан даврил бяст-ччалливу гьуртту хьунтIиссар 10-17 шинавун бияннинсса оьрмулул оьрчIру ва душру.
Пишардал усттаршиврун кьиматру бищунтIиссар 160-нния ливчусса экспертътурал.

Ххув хьусса оьрчIру кьамул бувантIиссар Аьрасатнал ва жула региондалийсса хьхьичIунсса предприятиярттай зун.
Мажлис къуртал хьуну махъ хьунни чемпионатрал даврия гьарта-гьарзану бусласи ккуркки столданул даву.