[dropcap]Ф[/dropcap]евральданул 20-21-нний Ваччиял цIусса школалий хьунни райондалий лакку мазрал дарсру дихьлахьисса учительтурал дянивсса конкурс.

Учительтал ккаккан буллай бия шанма ххуллийсса дарс дишаврил пагьму-гьунар: «Мастер класс», «Классный час», «Образовательный проект». «Мастер классраву» учительтурал дирхьуна лакку мазрал грамматикалун хас дурсса личIи-личIисса дарсру.

«Классный час» хас дурну дия аьмну лакрал миллатрал тарихран, лакку мазрайсса чичру хIасул шаврин, гания чирчусса аьлимтурал давурттан, словарьду сакин баврин, гайннул журардан. «Образовательный проектрай» учительтурал бувсуна цаява, дарс дихьлахьийни ишла бувайсса личIи-личIисса кьяйдардая. Учительтуран кьиматру бихьлай бия Ккуллал райондалул УО-лул хъунаманал хъиривма Оьмариев Жамалуттин, УО-лул пишакар АьвдурахIманов Нураттин, ЧIяйннал школалул лакку мазрал учитель Маммакьурбанов Арсений.

Конкурсрал ахирданий язи бувгьуна учительтал. Цалчинмур кIану буллуна ЦIуйшиял школалул учительница Маммаева Ламаран, кIилчинмур – ЧIяйннал школалул учительница Шалласуева Луизан, шамилчинмур – Вихьуллал школалул учительница МутIаллиева ПатIиматлун. Ххув хьуминнан буллуна дипломру ва арцуйну­сса бахшишру.