[dropcap]М[/dropcap]артрал 6-нний Дагъусттаннайн бувкIсса Аьрасатнал цIуллушиву дуруччаврил министр Вероника Скворцовал ДР-лул БакIчинал кIанайма Владимир Васильевлущал цачIу ххал бунни цаппара Дагъусттаннал азарханарду. Яла журналистътурахь бувсунни цанма ккавкмуния.
«ХIакьину жу ххал барду цIусса Перинатал центр (му тIивтIуну бивкIссар дукIу июльданий). ТIивтIуния шинмай микку бувну бур 2 азарунния ливчусса оьрчIру. Му бур лавайсса даражалул технологиярттай зузисса центр, щаллу бувну бур гьарица аьркинмунил. ХIакьину жу Владимир Аьбдуаьлиевичлущал цачIу ххал бигьарду бувсса оьрчIансса ва ниттихъансса реанимациялул къатта, цIусса технологияртту», — увкунни Скворцовал. Мунил бувсмунийн бувну, Перинатал центрданий хъин баврил хIасиллугу ххуйсса дур: ларгсса шинал республикалий 14 процентрал чан хьуну бур вилттили оьрчIру ливтIусса ишру. Вероника Скворцовал бувсунни цивппа бивну бушиву цаймигу азарханардайн. «Масалдаран, республикалул бугьара хьуминнал ва оьрчIал клиникалул азарханардай азар кIулгу дуллай, хъингу дуллай бур лавайсса даражалул технологиярттал гьанулий. МахIаттал хьун буллалисса ожогирттал центрданий хъин буллай бур бугьара хьумигу, оьрчI-бакIгу. Му центр бухлай бур билаятрал яла ххуйми 5 ожогирттал центрдавун. Микку зий бур яла хьхьичIунми пишакартал», — увкунни В. Скворцовал. Мунил мукунма бувсунни цивппа бивну бушиву цаймигу азарханардайн – травматологиялул (цIунцIиярттал), ортопедиялул, туннурдал азардал азарханардайн, дяъвилул ветерантурал госпиталданийн. Миккугу яла ххуйми, за кIулми хIакинтал зий бур.
Владимир Васильевлул бувсмунийн бувну, ми цивппа бивсса азарханардай ккавкмуния пахру бувансса асарду хIасул хъанай бур. Микку зузисса чIявуми духтуртурал вузру бувккуссар цайми регионнай. Ми Дагъусттаннайн бувкIун бур шикку цIусса журалул технологияртту ишла дуллай буну тIий.
Владимир Васильевлул бувсунни медициналул вертолетрал хIакъиравугу. «Уттигъанну Къизлардай, апатIсса иш хьуну, 5 хъамитайпа бивкIусса чIумал, апатI хьусса кIанайн цалчин, жулвасса бакъача, федерал катастрофардал медициналул центрданул пишакартал бивну бивкIссар», — увкунни ганал. Му иширалгу хъирив лаян аьркинну бур, мунал пикрилий.
ХIадур бувссар
ХI. Аьдиловлул
