[dropcap]В[/dropcap]айннал пикрилуцIунгу бавкьуну, дуллалисса лайкьсса даврин кабакьу бунни Хъусращиял жяматраву ххишала бакъа бусравсса, жяматрал оьрмулувусса иширттавух мудангу чялишсса гьурттушинна дувайсса Жабир Абакаровлул ва Эмран Суллуевлул.
Имара Саидова
Мажлисрайн оьвкуну, бучIан бувну бия бусса оьрмулий Хъусращиял шяраву чIявусса захIмат бивхьусса, эбратрай оьрчIру хъуни бувсса, утти оьрмулул бугьара хьусса ниттихъайн. Вай бялахъан, тяхъа буккан бан бучIан бувну бия балайлул гьунарду бусса Хъусращиял шяравасса чиваркI ва хъами. Шагьрулул кIанттурдай ччя-ччяни хьунабакьинсса сант дакъасса, нукIува шяраву кувнначIан кув бухху-букку буллай аьдат хьусса ниттихъан вания унгу-унгусса байран хьунни.
Ниттихъансса мажлисрал сий хъиннура гьаз дунни ва ми барча бунни футболданул легенда, ПаччахIлугърал Думалул депутат Валерий Газаевлул.
Мажлисрайн бувкIсса хъами дакIнихтуну барчаллагь тIий бия, ва кьини цивппа лахъа-хъун бувну, цахра хъуннасса къулагъас дурсса цинявннахь.
Мажлисрайн бувкIсса цинявппагу ниттихъан Камил Давдиевлул дуллунни тIутIив ва хасъсса бахшишру.
