Сочилиясса чагъар

ХIурмат лавайсса редактор Руслан Башаев!

Чичлай бура зул ччянива­сса букку, Уриннал шяраватуссаМирзал душУцумиева Анисат.ТтучIан «Илчи» бучIаваншиврул, ттул ссил душнил, мукьва кказит конвертраву бивхьуну, зуруй цал тIайла буккай Сочилийн.Нагу, навагу бувккуну, булара лакку мазрай буккин кIулминнахьхьунгу – мукунсса ца ххюя инсан ялагу ур.

Сочилий яхъанай ттул ряхцIаллий ххюра шинни. Ттул гъалатIирттайгу аьй мадари, оьрус махъру хIала хъанай бушиврулгу ялтту бучIира. Май зурул 9-ннийсса Ххувшаврил кьинилуцIун бавхIуну, на зул кказитрайн ттинингу чичав ца-кIира макьала, ттула буттан ва ласнан хас дурсса – ми Хъун дяъвилул гьурттучиталли.

ЦIанасса ва чагъар чичаврил савав ттул укунссар. 2017-кусса шинал октябрь зурул 6-нний бувксса «Илчилий» дия «Лак ххирасса яручу» тIисса заметка, ЧIурттащатусса Давыдов ХIусайннул чирчусса. Му макьалалийн бувну ттун ттула подруга лявкъунуккар. Му бусса бур Москавлив яхъанай. На тIурча, муничIан чагъар чичайссия Каспийскалийн, «ул. Советская, 7. кв. 71, Ахмедовой Равзат Гасановне» тIий. Чивчумунийн бувну, му бусса бур ккарччал хIакин, на навагу ккарччал хIакинна.

Жу хъинну цаннил ца хIурмат бусса дусталъяв, чичайссия цанничIан цаннил чагъарду. Яла махъ жул адресру дяйкьуна: на бивзссияв цайми къатрайн, Равзатгу лавгун бия Каспийскалия. Утти тIурча, «Илчилийсса» макьалалул кумаграйну, ттун лявкъунни ттула чIаванийсса оьр­мулул дус.

Хъунмасса тавакъюри редакциялухь ва му макьала чирчусса Давыдов ХIусайннухь оьвчаву ттучIан Сочилийн ва телефондалий: 8-928-852-88-04. На зуйн барчаллагьрай личIанна.
ЧIал къархьуну чичинна «Илчилийн» Гъумучиял шяраватусса хъинну лайкьсса хъамитайпалун хас дурсса макьалагу, му цуппагу аьпалувух бивхьуссар. Гьан банна зучIан мунил цила ттухь буслай, ккалай бивкIсса назмурду, куплетру. Му яхъанай буссия Сочилия арх ба­къасса кIанттайсса Туапсе тIисса шагьрулий.

Ларгсса шиналсса «Илчилул» 44-мур номерданий «Заманардал лахIзарду» тIисса рубрикалий дия 1930-ку шинал рирщу­сса «Хучраевхъал кулпат» тIисса цIанилусса сурат. Оьвчав Адлердай яхъанахъисса жула лаккучу, Гъумучатусса подполковникнайн (танал фамилиягу дур Хучраев), бусав Хучраевхъул тIисса, 11 инсан усса сурат душиву «Илчилий». Танан хъинну интIирис бивзун, чара бакъа сурат ккаккан учIанна куна. Амма къашава йхьуну, цалсса учIан къавхьунува ливчIунни. Ябуллай бура кказит Хучраев учIаннин.
Ттул саргъун бакъасса хатI­лилгу ялтту бучIияра: 43 ши­най канихь зий бивкIсса бормашиналул зурзулул биян був­сса асарди ва.

Анисат Уцумиева,
ш. Сочи